هەموو قسەكان كرا
کاوان ئەبوبەکر
لەماوەی چەندین ساڵی رابردوودا، زۆرێك لەسیاسیو حیزبو ئەندام پارلەمانەكان، رەخنە لەدەسەڵات ئەگرنو باسی گەندەڵییەكان ئەكەنو شەقامو هەستی خەڵك ئەهروژێنن، ئیتر بۆ موزایەدەی سیاسی بێت یان لەدڵسۆزییانەوە بێ.
ئەمانە لەزۆرێك لەكابینەكانی پێشوتری حكومەتدا دووبارەو چەند بارە دەبونەوە، خۆشبەختانەو بەرەواندنەوەی هەموو ئەو قسانەو رەواندنەوەی دڵی هاوڵاتیان، سەرۆكی ئەنجومەنی وەزیرانو جێگرەكەیو چەند وەزرێك ئەو دەستپێشخەرییەیان كردو زۆر بەموسەیتریو بێمنەتو بێ ترس چونە پارلەمان.
سەرۆكی حكومەتو جێگرەكەی كارێكی ناوازەو دەگمەنیان نەكردوە كاتێك چونەتە بەردەم نوێنەرانی خەڵك، بەڵكو ئەوە ئەركێكی وەزیفی خۆیانە لەرێگەی پارلەمانو ئەو نوێنەرانەوە رونكردنەوە بۆ خەڵك بدەن"هەرچەندە خەڵك ئەوەندەی كاری عەمەلیو ئەنجامی ئەوێت، ئەوەندە رونكردنەوەی ناوێتو پێویستی پێی نییە".
سەرەنجام دوای دەڕبڕینی هەموو دەردڵو كێشەو گەندەڵییەكانو قسەكانی دڵیان، پارلەمانتاران ئاراستەی ستافی حكومەتیان كردو زۆربەی زۆریشیان وەڵامو رونكردنەوەی پێویستیان وەرگرت، "ئیتر ئەو رونكردنەوەو وەڵامانە موقنیعو باوەڕ پێكراو بن یان نا" ئەوە شتێكی ترە، چونكە یەكێك نیەتی باوەڕكردنی نەبێت، هەرچی بەڵگەی دنیا هەیە بیكەیت بەقوڕگیدا باوەڕ ناكات.
لەكۆبونەوەكەی ئەمڕۆی پارلەماندا ئەوەندەی ئاگادار بووم، شتێكی تازەی ئەوتۆی تیانەبوو، بەڵكو پێشتر زۆربەیانمان لەفەیسبوكو كەناڵەكانی راگەیاندنەوە هەم پرسیارەكانو هەم وەڵامەكانیشمان بیستبوو، ئەوەی كە تازەو جێی سەرنج بوو:
1ـ سەرۆكی ئەنجومەنی وەزیرانو جێگرەكەی دانیان بە نە رەواندنەوەی ئاسەواری دوو ئیدارەی لەكوردستاندا نا، كە پێشتر بەو شێوەیە لێپرسراوانی باڵای حكومەت كە لەناو حیزبەكانیشیاندا هەر باڵان باس نەكرابوو.
2ـ قەرزەكانی حكومەت لەپێش جەژنەوە تا ئێستا زیاتر لەملیارێك دۆلار زیادی كرد بوو.
3ـ ئاشكرا بوو كە حكومەت بەهەموو دەزگاو ئۆرگانەكانییەوە ئاگاداری بەقاچاغ بردنی كەلوپەلنو دانیشیان بەوەدانا كە ناتوانن بنەبڕی بكەن، بەڵكو "بیرۆكەیان هەیە بۆ كەمترین رێژە نزمی بكەنەوە".
4ـ من بۆ خۆم وەڵامێكی خراپم لەوەڵامەكانی ستافی حكومەتدا نەبینییەوە، بەڵكو قسەكانیان باش بوو، بەڵام حیكمەت لەجێبەجێ كردندایە، لیژنەو لیژنەكاری بۆ هەموو ئەو دۆسیەو گەندەڵیانەی هەیە، تاچەند كارەكانیان وەك ئەوەی پێویستە جێبەجێ ئەكەن ؟، چەند سزادراو ئاشكرا ئەكرێت ؟، ئایا ئەو لیژنانە ئەتوانن هێڵە سورەكانی دوو ئیدارەیی ببەزێنن؟.
5ـ پارلەمانتارێكی ئۆپۆزسیۆن چاوەڕێی وەڵامی پرسیارەكانی خۆییو هاوكارەكانیشی نەكردو هۆڵەكەی بۆ چاوپێكەوتنێكی تەلەفیزیۆنی راستەوخۆ بەجێهێشت.
6ـ چەند پارلەمانتارێك داوای دەست لەكاركێشانەوەی حكومەتیان كرد بەبێ ئەوەی بەدیلێكی بەهێزیان هەبێت، تاكە بەدیلیان هەڵبژاردنی پێشوەختە بوو، كە خۆیان باش ئەزانن كوردوتەنی "عەینەن تاسو عەینەن حەمامە".
ئێستا بیرلەوە ئەكەمەوە هەندێك پارلەمانتارو سیاسەتمەدار دوای ئەم كۆبونەوەی ئەمڕۆ ئیتر باسی چی بكەن، بەراستی هەموو قسەكان كران، باوەڕناكەم شتێك مابێت نەوترابێت، لەبەرامبەریشدا وەڵامو رونكردنەوە درا، پێناچێت بەلای زۆرینەی خەڵكیشەوە ئەم كۆبونەوەیە گرنگ بوو بێت، چونكە وەك وتمان خەڵك كاری فیعلیو بەپەلەی ئەوێ، رونكردنەوەی ناوێت، موچەی ئەوێ، بژێوی ئەوێ، گرنگ نییە بەلایەوە هۆكارەكانی چین، بۆیە تاكە چارەسەر لای حكومەت پەلە كردنە، پەلە لەهەموو شتێكدا، لەچاكسازییەكانیدا، لەپێدانی موچەدا، لەسزادانو دەستگیر كردنی گەندەڵكاراندا، لەكاتدا، وەك دەوترێت "كات وەك شمشێر وایە، ئەگەر نەیبڕیت، ئەتبڕێت".
AM:09:59:06/10/2020
ئهم بابهته 1564
جار خوێنراوهتهوه
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی