‌دۆناڵد ترەمپ سوپرایزی گەورەی تۆمارکرد
PM:01:42:09/11/2016
عه‌بدولڕه‌حمان عه‌لی ڕه‌زا

دۆناڵد ترەمپ کاندیدی کۆمارییەکان بۆ پۆستی سەرۆکی ویلایەتە یەکگرتوەکانی ئەمریکا لەو ڕۆژەوەی بۆتە کاندیدی سەرۆک کۆمار لەلایەن پارتی کۆمارییەکان، لەلایەن هەندێ لە سیاسی و شرۆڤەکار وچاودێر و تەنانەت زۆرێک لە هاوڵاتیانیشەوە بە کەسێکی بێ ئەزمون و تەنانەت شێتیش لەقەڵەم دەدرا، بەڵام ترەمپ ئەم قسەوتێڕوانینانە نەک کاری لێنەکرد و پەشیمانی نەکردەوە لەخۆکاندیدکردنی، بەڵکو بە پێچەوانەوە و بەلێدوانە جیاواز و سەرەنج کێشەکانی سەرەنجی زۆرێک لەخەڵکی بەلای خۆیدا ڕاکێشا .

 بەهەرحاڵ ترەمپ توانی لە هیلاری بباتەوە کە ئۆبامای سەرۆک کۆمار ڕیکلامێکی زۆری بۆدەکرد و بیل کلینتنی هاوسەریشی کە خۆیی و ئۆباما ۱٦ ساڵ سەرۆکی ویلایەتە یەکگرتوەکانی ئەمریکا بوون نەیانتوانی ببنە فریاد ڕەسی هیلاری کلینتن و بینێرنە نێو کۆشکی سپی، ئەمە جگە لەوەی هیلاری بۆخۆی کەسێکی ناسراوە لەدنیادا.

ترەمپ چەند سوپرایزێکی گەورەی تۆمارکرد لەوانە ؛ ــ ترەمپ توانی لەنێو کۆمارییەکاندا و لەنێو ۱۷ کاندید بۆ سەرۆکایەتی ئەمریکا، لەهەموویانی بردەوە و بووە تاکە کاندیدی هەڵبژێردراوی کۆمارییەکان لەگەڵ ئەوەی ترەمپ دەمێک ساڵ نیە لە نێو پارتی کۆمارییەکان کاردەکات وچۆتە ناوییەوە .
 ــ ترەمپ توانی ببێتە ٤٥ هەمین سەرۆکی ویلایەتە یەکگرتوەکانی ئەمریکا و زۆرترین دەنگی هاوڵاتیانی ئەمریکا بۆ خۆی مسۆگەر بکات .

ــ ترەمپ هەموو ئەو سەنتەر و پەیمانگا جۆراوجۆرانەی بەدرۆ خستەوە کەگرەویان لەسەر دۆڕاندنی دەکرد، دەرکەوت کەتەنها هاوڵاتیان و دەنگدەرانی ئەمریکا بڕیاردەدەن کێ سەرۆکە .

 ــ ترەمپ لەگەڵ سەرکەوتنی سوپاسی هیلاری کرد کە پیرۆزبایی سەرکەوتنی لێکردوە، دوای کێبڕکێیەکی زۆر لەهەڵبژاردنەکاندا.

ماوەتەوە بڵێین ئەوە ئیرادەی بەرزی هاوڵاتیانی ئەمریکایە کە ناهێڵن حیزبێک زیاتر لە ٨ ساڵ بەردەوام بێت لەحکومڕانی، بەڵکو گەلێکی زیندون  و هەمیشە حەزیان بە ئاڵوگۆڕ و گۆڕانکارییە.

لەکۆتایدا سەرکەوتنی هیلاری یان ترەمپ وەک ناو بۆ ئێمە گرنگ نیە، بەڵکو ئەوەی گرنگە بۆ ئێمە هەگبەی کارنامە و هەڵوێست و تێڕوانینەکانیانە لەبەرامبەر گەلی کورد و دۆزە ڕەواکەی، دەبێت باشیش هەموان ئەو ڕاستیە بزانین کە وتە و لێدوانەکانی ساتی بانگەشە شتێکی ترە و کارکردن لە ئەرزی واقیعدا شتێکی ترە .


هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.