‌کوشتنێکی سەیر و نامۆ !
PM:01:35:29/01/2019
عەبدولستار مەجید


کوشتنێکی سەیر و نامۆ ! 
خەریکە دەبینە نێچیری ئەم جەنگە دەرونییە

لەسەروبەندی جەنگی دووەمی جیهانیدا بە تۆمەتی سەرپێچیکردن لە فەرمانەکانی، هیتلەر بڕیاری سزادان بۆ سێ ئەفسەری سوپا دەردەکات بەڵام بە ڕێگایەکی سەیر و نامۆ سزاکەیان بەسەردا جێبەجێدەکات !

هەریەک لەو سێ ئەفسەرە بە جیا لە ژوورێکدا زیندانی دەکات .

لە هەر ژورێکدا مۆسیقایەکی کلاسیک و دڵۆپە ئاوی هێواش و لەسەرخۆی تک تک دێتە خوار و سێ ئەفسەرەکەش دەست و قاچیان بەستراوەتەوە و هەریەکەیان لە یەکێ لەو ژوورانە بەند دەکرێن .

پێیان دەڵێت گازی ژەهراوی و کوشندە دەکرێتە ئەم ژوورانەی ئێوە تیایدا زیندانین و دوای ٦ سەعاتی دیکە دەتان کوژێت .

دوای ٤ سەعات هیتلەر دەچێت تا بزانێت دۆخی ئەو سێ ئەفسەرە زیندانیکراوە چۆنە ؟ 

دەبینێ دوانیان گیانیان لەدەستداوە سێهەمیشیان لە گیانەڵادایە و دوایین هەناسەکانی ژیانی دەدات .

ئەوەی جێگەی سەرسوڕمانە هیچ غازێکی ژەهراوی لەو ژوورانەدا بوونی نەبوو، بەڵکو تەنها فێڵ و جەنگێکی دەروونی بوو کە هیتلەر لەگەڵیان کردی بۆئەوەی لە ڕێگەی ڕووخانی دەرونییەوە بیانکوژێت بە بێ ئەوەی هیچ گازێکی کوشندە بونی هەبوبێت .

لە ڕاستیدا هەندێ کەناڵ و ماکینەی ئیعلامیی لەم سەردەمەدا هەمان فێڵی هیتلەر لەگەڵ کۆمەڵگە بەکاردەهێنن، شتێک دەوروژێنن کە هیچ بنەمایەکی نیە و ئێمەش لێمان دەبێ بە ڕاست و خۆمان و کۆمەڵگەشی پێ دەکوژین !

ئه‌م بابه‌ته 2712 جار خوێنراوه‌ته‌وه‌‌
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.