رادیكالییەتی نەوشیروان مستەفا

‌ره‌حمان غه‌ریب


رێكەوتنی سیاسی گۆڕان و یەكێتی، سەرلەنوێ رادیكالییەتی رێكخەری گشتی بزوتنەوەی گۆڕان، كاك نەوشیروانی هێنایەوە ناو دیمەنی سیاسی چەقبەستوی هەرێم، لە بارودۆخ و زەمانێكی جودا، جودا بە هەموو رەهەندەكانی سیاسەت، سیاسەتیش وەك هونەر.

رادیكالییەتی كاك نەوشیروان لە قۆناغەكانی خەباتی سیاسی و سەربازیدا، لە پەیوەندیەكانی لەگەڵ یارو نەیاردا روون بووە، فرسەتی ئەوەی جێنەهێشتووە دوو تەفسیری جیا بۆ هەڵوێستەكانی بكرێت، ئەمە بەو مانایە نا كە قوڵایی دبلۆماسی تیا نییە، بەڵكو بە مانای رادیكاڵ و شۆڕشگێرێكی سەرسەخت بۆ بیروباوڕی سیاسی ئەوسا و ئێستای بزوتنەوەكەی.

 ئەو لە خەباتی  سیاسەتی ڕۆژانەیدا لەو كەسانەیە كە بەردەوام بە ئاڕاستەی گۆڕانی بنەڕەتی بەرنامەی داڕشتوەوەو خەباتی بۆ كردوە، رادیكالییەتی ئەم سیاسەتمەدارە لە سەر ڕەشنوسی كۆتایی دواڕێكەوتن نامەكەیشی لەگەڵ یەكێتیدا دیارە.

خاڵی جەوهەری رێكەوتن نامەكە گۆڕینی سیستمی حوكمڕانییە لە هەرێمی كوردستان، خۆ یەكێتی و لایەنی تریش خەباتی بۆ ئەم ئامانجە كردوە، بەڵام بۆ هەتا هەتایە هەر مۆری  بزوتنەوەی گۆڕان و رێكخەركەی لەسەر دەبێت.
تەماشاكەن دەست و خەتی ئەم سیاستەمەدارە لەناو ڕێكەوتنەكە بە جۆرێك روونە كە هیچ جارێك نامانباتە سەر رێگای سێهەم و چارەسەری مام ناوەند، تەفسیری جیاوازجیاواز، یەك رێگایە، رێگایەك كە خۆی رێبەری كاروانەكەیە.

كاروانی سیاسی پاش قۆناغی ئیمزاكردن، جگە لە رێكخەرو چاوساغەكەی كە( نەوشیروان مستەفا)یە، كەم كەس شارەزای تولە رێگاو كیڵگەی مین و بۆمبە چێنراوەكانیەتی. دەزانی ئەم رێگایە قوربانی دەوێت، جا حەشامەتێ لەحزب ملی لە مو باریكتر بێت لە رێی ئەم كاراونە، ئیدی ئەندازیاری شۆرشەكە باكی بە چییە.

خۆ زۆرن رادیكاڵەكانی ناو بزوتنەوەی گۆڕان، لە فەیسبوكەوانەكانیانەوە بۆ باژێرەوانەكان، لە پەرلەمانتار تا وەزیر، بەڵام رادیكاڵیەتیان كاتی بوو، لە توانایان كەمناكەمەوە، بەڵام هەر لە سێبەری  رادیكالییەتی رێكخەرەكەیاندا مابونەوە. لە غیابی كاتی ئەویشدا هێشتا هەر نەهاتنە بەر روناكی و ببنە سەرقافڵەی كاروانی گۆڕانكاری.

بەڵام بۆ دەبێت رێكەوتنی سیاسی گۆڕان و یەكێتی، رادیكالییەتی رێكخەری گشتی بزوتنەوەی گۆڕان، كاك نەوشیروان بهێنێتەوە ناو دیمەنی گشتی. ئەی یەكێتی؟. خۆ رێكەوتنی دوو لایەنە، وەڵامەكە ساكارە ئەوە قەناعەتی سیاسی كاك نەوشیروان نییە كە گۆڕاوە، خەڵكی ترە هاتونەتە سەر قەناعەتە رادیكاڵەكانی. ئەو بە هەمان بیروڕای پێشووی هەوڵی گۆڕانی بنەڕەتی دەدات، ئەمجارەیان بە پشبەستن بە خاوەن بڕیاری راستەقینەی ناو ئەو حزبە، ئامرازیش هاوپەیمانی سیاسییە.

هاوپەیمانێتیەك كە كارلێكی بۆ سەر جەستەی پان و پۆڕی یەكێتی، ئەوەنە كاریگەر دەبێت، ئیدی چاودێرە زۆرو زەوەندەكانی سەر شاشەكان، بۆیان جیا نابێتەوە كامەیە هەڵوێستی یەكێتی و كامەش هەڵوێستی گۆڕان؟.
ئەمە گەورە كردنی كەسێك نییە، كە خۆی قەبارەو كاریگەری لەناو دیمەن و پرۆسەی سیاسیدا دیارو كاریگەرە. بەڵكو بیر خستنەوەی هەموو ئەو "سیاستمەدار"انەن كە ئەم پیاوە بەتەنها فرسەتی تەماشاكردن‌و چەپڵەلێدانی بۆ رەخساندون، ناوە ناوە رێگەیان پێ دەدات سەرسام بن بە تەماشكاكردنی تەكتیكی سیاسی و هونەری بادانی دەستی سیاسەت بۆ ئامانجی مومكین.

هەروەك بیرخستنەوەی ئەوانەشە كە بە چونە ناو دەسەڵات ئیدی دەسبەرداری روحی شۆڕش بوون و وایانزانی لە سەردەمی "ئین تی خابات" دەبێت روحی شۆڕشگێڕی لە (قۆپییەكانی قەراغ) جیبهێڵن، بەڕێز نەوشیروان ئەمەی نەكرد، بۆیە تەماشای بكەن و چەپڵە لێبدەن.


PM:12:09:17/05/2016

ئه‌م بابه‌ته 6094 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی