‌توانا عوسمان لە دەفتەری یادەوەریمدا
PM:12:31:05/03/2019
ره‌حمان غه‌ریب

ئەو كاتە توانام ناسی كە لەگەڵ رامیار محمود پێكەوە یەك بابەتیان دەنوسی، یەكەم بەركەوتنی من لەگەڵ توانادا، پرسیارم لێكرد: چۆن دوو دونیا بینی جیاواز، لەسەر یەك بابەتی هەستیارو هەندێك جار ئاڵۆزیش یەكدەگرنەوە؟

وەڵامەكەی ئەوم لەیاد نەماوە، بەڵام لە یادمە ئەو بەردەوام لە "هاوبەش"ی نێوان خۆی‌ و بەرامبەری "جیاواز" دەگەڕا، دەیدۆزییەوە دونیایەك خۆشەویستی بۆ گیانی هاوڕێیەتی جوانی ئەو سەردەمە، كە رێزمان لە جیاوازی یەكترو كارمان لەسەر خاڵە هاوبەشەكان دەكرد. ئەو كاتەی جیاوازبووم لەگەڵ توانا، زیاتر هەستم بەڕێزی ئەو كردوە بۆ نوسینەكانم.

تواناو هاوڕێكانی لە رۆژنامەی هاوڵاتی، میدیای كوردستانی پاش راپەڕینیاین خستە سەر رێڕەوێكی نوێ، ئەوكات میدیا بەگشتی بایەخی بە هەواڵی توشبونی بەرپرسێكی حزبی بە هەڵامەت، دەخستە پێش هەواڵی پیسبوونی سەرچاوەكانی ئاوی خوادنەوەی هاوڵاتیان، رۆژنامەی هاوڵاتی پشتیكردە هەواڵی لەرزوتاو سەردانی پرۆتۆكۆڵی بەرپرسان، رووی كردە خەمەكانی هاوڵاتیانی پەراوێزخراو و فەرامۆشكراو، توانا پشكی لەم بەرەوپێشچونە هەیە.

توانا زاكیرەیەكی گەنجانەی چالاكی هەیە، كاتێك یادگارییەكانی سەردەمی رۆژنامەی هاوڵاتی دەگێڕێتەوە دەچێتە وردەكاری ئەو كێشانەی دەهاتنە بەردەم كارەكان، مەبەستم ئەو كاتانەیە كە بەرپسی پەیامنێرانی ئەو رۆژنامەیە بووم، زۆر قەدیم نیم. گێرانەوەكانی تێكەڵ دەكات بە وێستگە خۆشەكانی كاری پیشەییمان لەو رۆژنامە ئازیزەی كە سەدانی پەروەردەكرد، بەشێكی زۆریان توانا وەك مامۆستای خۆیان تەماشا دەكات.

بەر لەنزیكەی 10 ساڵ، واتە ئێوارەی 13ی ئابی 2009، هیوای مەحمود عوسمان و توانا، پێكەوە بوون، پەیوەندییان پێوەكردم تا بچمە لایان. چومە ژووری كۆبونەوەكانی رێكخراوی پەیمانگای رۆژنامەوانی جەنگ‌ و ئاشتی (IWPR)، لەوێ شەهید عەمار ئەلشابەندەر، توانا عوسمان، پارێزەر رازاو شریف لە ژورەكە بوون.

یەكسەر هیوا وتی: پرۆژەیەكمان هەیە تایبەت بە میدیاكاران، داكۆكی و پێشكەشكردنی راوێژە، بۆ IWPR دەچووە، دەمانەوێت ببیتە رێكخەری پرۆژەكە. توانا بۆخۆشی وتی: قاتێكە بۆ بەری تۆ.

ئیتر ئەم سەنتەری METRO یەی لێ بەرهەم هات. كە 13ی ئابی داهاتوو یادی 10 ساڵەی دامەزراندنی دەكەینەوە.

ئێمە بە شانازییەوە وێنەی دەستەی دامەزرێنەرانمان لە METRO هەڵواسیوە، توانا یەكێكیانە. هەوەها ئەو بەڕێوەبەرەكانی سەنتەر، رازاو شەریف، مەریوان حەمە سەعید، ئاوات عەلی، ئێستا (دیاری محەمەد) بەڕێوەبەرە.

توانا رۆژی دوو شەممە بە كۆمەڵێك پێشنیازەوە هاتە لامان خەمی ئەو لەگەڵ كۆمەڵێك هاوڕێی ترمان ئەوەیە كە گوتارو چالاكییەكانی میترۆ بچێتە قۆناغێكی نوێ، گوتاری تازە بكاتەوە، ئامرازی تری مەدەنی تاقیبكاتەوە، سوپاس بۆ توانا كە وەك هاوپیشەو رەفیقێك خەمی سەرخستنی ئامانجەكانمانە كەئەو لەگەڵ كۆمەڵێك هاوڕێی تری خەمخۆری ئازادی بەردی بناغەكەیان داناوە.

لەگەڵ توانا نە پرۆژەی هاوبەش، نە ئەو، نە من، نیازمانە پێكەوە كار بكەین، رەفیقمە لە هەر كوێ كار بكات هیوای سەركەوتنی بۆ ئەخوازم. لە هەر كوێ بەرپرسیارێتی هەبێت، نزیك یان دوری هەر خاوەن كار‌و گروپ و كەسایەتییەك بووبێت، تا ئێستا سەربەخۆیی خۆی پاراستوە، كاریگەری هەبووە نەك كارلێكراو.

ئەوەی لە سەكۆكانی رقوكینەوە بەرامبەر ئەم هاوڕێیەمان وترا، بەشێكی دەرهاوێشتەی قبوڵنەكردنی جیاوازی‌ و ونكردنی راستییەكەیە لەناو گێژاوی درۆ و كۆنەقین.

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.