گەلی کوردستان دەستەمۆ ناکرێت!

‌د. کاوە مەحمود

لە کاتی ژمی نان خواردن پڵنگەکە بە پاسەوانە دەستەمۆکەرەکەی ووت: کاتی نان خواردنمە. خواردنم بۆ بێنە.

پاسەوان ووتی: تۆ بەندکراوی منی چۆن دەتوانی بەم شێوەیە داوای خواردن لە من بکەی؟ لێرەدا تەنها من مافی بریار وەرگرتنم هەیە، و فەرمان دەکەم.

لە وڵامدا پڵنگ ووتی: من پڵنگم کەس فەرمان بەسەر مندا ناکات.

پاسەوان ووتی: تۆ جاران لە نێو دارستان و وڵاتی خۆت پڵنگ بووی. ئێستا تۆ کۆیلەی، و من خواردنت دەدەمێ و دەبێ گوێڕایەڵی فەرمانەکانی من بیت.

پڵنگ لە وەڵامدا ووتی من کۆیلە نیم و خواردنی تۆم ناوێت.

یەکەمین رۆژ پڵنگ بە برسێتی مایەوە و دووەم رۆژ دەستەمۆکەر هاتە لای پێی ووت تۆ برسیتە، تەنها بڵی من برسیمە گۆشتت بۆ دێنم.

پڵنگ بە ناچاری ووتی برسیمە، و دەستەمۆکەر بە پێکەنینەوە بە قوتابییەکانی خۆی ووت: بینیتان چۆن کەوتە نێو تەلەیەکەوە کە هەرگیز لێی دەرناچێت!

رۆژی سێیەم دەسەتمۆکەر بە پڵنگی ووت گۆشتت دەدەمێ بە مەرجێ بەرزبێتەوە و لە سەر پێت لەبەردەمم ڕابوەستێت. پڵنگ ئەم داواکارییەی بە دڵ نەبوو بەڵام لە کۆتاییدا بە ئاسایی لە قەڵمی دا و جێبەجێ کرد.

لە رۆژی چوارمەدا دەستەمۆکەر داوای لە پڵنگ کرد بمیاوێنێت تا گۆشتی بداتێ، و پڵنگ لە تاوی برسێتی ویستی بمیاوێنێت بەڵام نەڕاندی، و دەستەمۆکەر قایل نەبوو، و داوای کرد پڵنگ مەشقی میاواندن بکات.

پڵنگ بە درێژایی شەو خەونی بە دارستان و نیشتمانی خۆی دەبینی و بەدەم خەوەوە هاواری لێ هەڵدەستا و کەی ڕوایە بمیاوێنێت و بانگی پڵنگەکانی دیکەی دەکرد، بەڵام بێ سوود بوو، و بە ناچاری لە ڕۆژی پێنجەمدا وەک پشیلە میاواندی.

لە شەشەمین ڕۆژدا پاسەوانی دستەمۆکەر داوای لە پڵنگ کرد وەک کەر بزەرێت تا گۆشتی بداتی، و پڵنگ لە وەڵامدا ووتی: دەمرم و ئەم داواکارییە جێبەجێ ناکەم.

لە حەوتەمین رۆژدا پڵنگ بە ناچاری چاوی خۆی نوقاند و لە ژێر فشاردا وەک کەر زەڕی، و دەستەمۆکەر پێی ووت: هەرچەندە باش نەزەڕیت بەڵام گوناحی پارچەیەک گۆشتت دەدەمێ.

لە رۆژی هەشتەمدا دەستەمۆکەر بە پڵنگی ووت: خوتبەیەک دەدەم و دەبێ تۆش چەپڵە لێ بدەیت. دەستەمۆکەر دەستی بە خوتبەی خۆی کرد ووتی: هاوڵاتیان من فریاد ڕەسم و دووارۆژ و چارەنوسی ئەم وڵاتە بەندە بە منە و بە باوەڕبوون بە من سەردەکەون.

هەرچەندە پڵنگ ووتی: من هیچ تێنەگەیشتم، بەڵام دەسەمۆکەر پێی ووت کە کاری تۆ چەپڵە لێدانە، و پڵنگ هەردوو دەستی لە ئاکامی چەپڵەلێدان سوور بۆوە، بەڵام لە کۆتاییدا دەستەمۆکەر خواردنی بە پڵنگ نەدا ووتی من خەڵکی درۆزن و دوو ڕووم خۆش ناوێت.

رۆژی نۆیەم دەستەمۆکەر باوەشێک گیای بە دەستەوە بوو و خستیە بەردەم پڵنگ و ووتی لەمەودووا تۆ دەبێ گیا بخۆیت. سەرەتا پڵنگ نەیدەتوانی نزیک لە گیاکە ببێتەوە، و بێزی دەهاتەوە، بەڵام لە کۆتاییدا بە هۆی برسێتی بە ناچاری گیاکەی خوارد.

زکریا تامر کۆتایی بە چیرۆکەکەی دێنێت و دەنووسێت: لە دەیەمین رۆژدا دەستەمۆکەر و قوتابییەکانی و پڵنگ و قەفەس نەما، و پڵنگ بوو بە هاووڵاتی و قەفەس بە شار.

خوێنەری بەرێز!

لە سەردانێکی دوو سەرکردەی سەرەکی حکومەت بۆ سەرجەم حزبەکان لەوانەش حزبی شیوعی لە ماوەی دووای ریفراندۆم و ڕووداوەکانی 16ی ئۆکتۆبەر و تەواوبوونی جموجۆڵی سەربازی دەوڵەتی عێراق دووای بەرەنگاری هێزی پیشمەرگە لە پردی و سحیلا، بە کورتی ئەم چیرۆکەی زکریا تامرم بۆ گێڕانەوە، و لە کۆتاییدا ووتم گەلی کوردستان دەستەمۆ ناکرێت، و بەشێک لە کاری بەرەنگاربوونەوە ئەوەیە کە ئێوە و بە هاوکاری هەمووان بەرپرسیارن و نابێ ماوە بدەین تاکی کوردستانی دەستەمۆبکرێت و بمیاوێنێت یان دەنگی نەشازی لێوە بێت.

پرۆسەی دەستەمۆکردن بە شێوازی جۆراجۆر بەردەوامە، و شەڕی دەروونی لە گەڵ تاکی ئەم کوردستانە دەکرێت و بە شێوازی جۆراجۆر برسی دەکرێت و نەیارانمان دەیانەوێ، هەموو هەست و داوامان لە چوارچێوەی موچە کۆکەنەوە و کاردەکەن بۆ گەڕاندنەوەی کەرکوک و خانەقین و شنگال و مخمور و بابەتی پیرۆزی خاک و ئاڵای کوردستان و تەنانەت خەوبینین بە سەربەخۆیی و مافی چارەنووس کۆمەڵێک بابەت بێت لە فەرهەنگی خەڵکی کوردستاندا نەبێت و نەمێنێت، بەڵام جوتیارانی کورد لە حەفتەغار و پەلکانە و خەرابە و تەواوی ناوچەی شارۆچکەی سەرگەرانی کەرکوک لە هەفتەی ڕابووردوو چاوەڕیی کەسیان نەکرد و بە کردەوە سەلماندیان کە دەستەمۆ ناکرێن و بۆ مافی خۆیان شەڕ دەکەن و پەنا نابەنە بەر پاڕانەوە لە زەوتکەری مافەکانیان.

گەلی کوردستان پڵنگێکی سەرکەش و ئازادە و شانازی بە خۆیەوە دەکات، و بۆ وەدەسهێنانی مافەکانی چاوەرێی لایەن و کەسانی ڕاڕا و بەرژەوەندخواز و دەستەمۆکراو ناکات، و ناپاڕێتەوە.