سێ قسەکەی تڕەمپ و دیدارەکەی نێچیرڤان بارزانی

لە دیداری نێچیرڤان بارزانی و دۆناڵد تڕەمپ باسی هەرێمی کوردستان کرابێ یان رۆژئاوای کوردستان یەک مانا و لێکدانەوە هەڵدەگرێت کە بارزانی و قەوارەی دەستوری هەرێمی کوردستان ناوەندی بڕیار و یەکلایی کردنەوەی پرسی گەلی کوردستانن لەگەڵ هەرچوار پارچەی کوردستاندا.

تڕەمپ یەکەمین دوای پێشوازیکردنی لە شاندی کوردستان خۆی نێچیرڤان بارزانی بە ئامادەبووان و رۆژنامەوانان ناساند بە دەستەواژەیەکی دیرۆکی و جێی ڕامان بە ئاماژەکردن بۆ سەرۆکی هەرێمی کوردستان بە هەمووانی گوت:"ئەوە تێکۆشەرێکی مەزنە" لێرەدا تڕەمپ بە هەموو دنیای گوت ئەوەی پێشوازی لێدەکەم و لەگەڵی دانیشتووم کەسێکی ناوازە و تایبەتە کەسێکی جێگای ستایشی گەلی خۆی(کوردستان) و گەلی ئەمریکا و هەموو ئەو لایەنانەیە کە دژی تیرۆر جەنگاون.

باسکردنی نەوت و بازاڕی وزە لە نێوان هەردوو سەرۆک دا ئاماژەیەکی دیکەیە بۆ پێشکەوتنی پەیوەندی و تۆکمەتر بوونی پێگەی هەرێمی کوردستان لە سەر نەخشەی وشەی جیهانی،ئەو نەخشەیەی(نەخشەی وزەی جیهان) کە هۆکاری سەرەکی و کاریگەر بوو بۆ ئەوەی قەوارەی دەستووری هەرێمی کوردستان بە هێزەی ئێستایەوە لە سەر نەخشەی سیاسی و گرنگیدانی جیهان جێگای ببێتەوە،ئەوەش بۆ سیاسەتی دەرگای کراوە(ئابوری سەربەخۆ) دەگەڕێتەوە کە نێچیرڤان بارزانی دامەزرێنەر و رابەریەتی کردووە،کە خاڵی هاوبەشی بەهێزی هەرێمی کوردستان و وڵاتانی دنیایە، هەر ئەوەش هۆکاری مانەوەی قەوارەی دەستووری هەرێمی کوردستان بوو دوای خیانەتی شازدەی ئۆکتۆبەر کە حکومەتی بەغدا بە پاڵپشتی میلیشیاکانی حەشدی شەعبی و حیزبوللای لوبنانی و سوپای پاسدارانی ئێران بە دەست دۆیی چەند کەسێکی ناو حیزبێکی کوردستانی شاری کەرکوکیان داگیر کردەوە.

ئەوەی پێویستە دەربارەی ئەو دیدارەی داڤۆسی نێوان بارزانی و تڕەمپ بگوترێ ئەوەیە کە نێچیرڤان بارزانی لە دیدارە و لەوانەی داهاتووش نوێنەرایەتی دیرۆکی زیاتر لە دوو سەت ساڵەی بنەماڵەکەی(بارزانی) و گەلەکەی (گەلی کوردستان) دەکات لە پێناو و ئازادی و سەربەخۆیی کوردستان.

PM:09:38:22/01/2020

ئه‌م بابه‌ته 3756 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی