‌ موقتەدای سەدر وەک ڤایرۆس...شوێنکەوتوانی وەک ڤایرۆسپەرست
PM:02:00:22/03/2020
مەریوان وریا قانیع



ئەوەی ئەم گرتە ڤیدیۆییە نیشانیدانی دەرکەوتە دینییەکەی ئەو کارەساتە گەورەیەیە کە عێراقی ئەمڕۆی تیادا نووقم بووە. موقتەدای سەدر مناڵێکی نەزان و سەرڕۆی ئایەتوڵایەکی دینییە. لە باوکییەوە سەرمایەیەکی دینیی گەورەی بۆ ماوەتەوە و لە دوای کەوتنی سەدامەوە خاوەنی سوپا و میلیشیای تایبەت بە خۆیەتی کە ھەرجارە و لەژێر ناوێکدا ڕێکیاندەخات و کاریاپێدەکات. سەرێکە لە سەرەکانی ناو ئەو چەند خێزانە دینییە سیاسییە شیعەیە کە ھەریەکێکیان ئەمڕۆکە بەشێک لە دەسەڵات و سامانی عێراقی لەژێر دەستدایە. ئەم میلیشیایەی موقتەدای سەدر خۆی بەسەدان و ھەزارانیان لێکوژراوە و بەسەدا و ھەزارانیشیان کوشتوە.

زۆرینەی شوێنکەوتوەکانی سەدر کەسانی کەم دەرامەت و ھەژار و پەراوێزخراوی ناو کۆمەڵگای عێراقین. ئیتیما بۆ دین و ئینتیما بۆ خێزانێکی دینیی سیاسیی تەواو ئالودەی کردون و ھۆشیارییەکی تەواو شێواو و ناھۆشیاریی بەسەردا سەپاندون. ئەم ھەوادارانە کە لەم ڤیدیۆیەدا و لەم کارەساتی بڵاوبوونەوەی ڤایرۆسی کۆرۆنایەدا بچووکیی و ملکەچیی خۆیان بۆ سەدر دووباردەدەکەنەوە، نیشانیئەدەن عێراق لەناو چ کارەساتێکی دینیی و سیاسیی و کولتوریدایە.

ئەم فۆرمەش لە دینداریی کە لەسەر دروستکردنی قەرەباڵغیی و حەشامەت کاردەکات، کە دین لە ھەموو ڕەھەندێکی ڕۆحیی و تاکەکەسیی دادەبڕێت، ھەمان ئەو فۆرمە شانۆیی و نمایشگەرانەی دیندارییە کە لە ئێستادا لە بەشێکی گەورەی خۆرھەڵاتی ناوەڕاستدا ئامادەیە.

لەم قەرەباڵغیەدا دین لە باتی ئەوەی پەیوەندییەکی ڕۆحیی و ئەخلاقیی بێت لە گەڵ خودای ئیماندارەکاندا، نمایشی تەسلیمبوونە بە سەرۆکێکی دینیی. ”بەشانۆکردنی دینداریی" ئاکاری سەرەکیی دینداریی بەشێکی گەورەی ھێز و تەوژم و فێرگە دینییەکانی ئەمڕۆن. لەمەشدا خۆدەرخستن وەک ئایندارێکی ڕاستەقینە، وەک ھەوادارێکی سەرسەخت، ئاکاری سەرەکییە، نەک ڕاوەستان لەبەردەم خودیەکدا کە لە ئاسمانەوە سەیری ئیماندارەکانی دەکات.


هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.