مامەڵەی پیشەیی لەگەڵ خۆپیشاندەراندا
عەدالەت عەبدوڵڵا
بە دووبارەبوونەوەی ئەزموونی تەقەكردن لەخۆپیشاندەران، لەو جۆرەی كە سێشەممە 19/12، لەشاری رانیە روویدا، رووندەبێتەوە كە وەزارەتی ناوخۆی حكومەتی هەرێم، كاری لەسەر تێپەڕاندنی ئەو هەڵە كوشندانە نەكردووە، كە لەخۆپیشاندانو ناڕەزاییەتییەكانی ناوچە جیاجیاكانی هەرێمدا، لەسەر دەستی هێزەكانی ئاسایشی ناوخۆ، یان گروپی تری چەكدار، روودەدەن. راستە، رەنگە بەشێك لەوانەی تەقە دەكەن، پاسەوانی بارەگاكان بن، بەڵام ئەركی بڵاوەپێكردنی خۆپیشاندەر، لەكۆتاییدا، بە ئیمتیاز، ئەركێكی دەوڵەتییە.
لێرەدا، بۆیە بەدیاریكراوی دەڵێین وەزارەتی ناوخۆ، چونكە لەنەریتی وڵاتانی جیهاندا، وەزارەتی پەیوەندیدار، بۆ كۆنتڕۆڵكردنی هەر ناڕەزایەتییەكی چینوتوێژە كۆمەڵایەتییەكان، كە هەڕەمەكیو ناڕێكخراوبنو بەرەو زیاندان بچن لەشوێنە گشتییەكانو دەزگا خزمەتگوزارییەكانو ئاژاوەیان لێبكەوێتەوە، تەنها وەزارەتی ناوخۆیە.
ئەم وەزارەتە، لەڕێگەی دەزگای پۆلیسی مەدەنیی تایبەتەوە، كە تەرخاندەكرێت بۆ مامەڵە لەگەڵ چالاكییە مەدەنییەكاندا، هەوڵی ئەنجامدانی ئەركێكی دەوڵەتیی گرنگ دەدات كە بریتییە لەپاراستنی سەروماڵی گشتی، گیانی خۆپیشاندەرانو بڵاوەپێكردنیان،
سەری كارمەندانی ئەو دەزگایە خۆیو دواجاریش گێڕانەوەیەكی پیشەییانەی ئاسایشو ئارامی. ئەو دەزگا تایبەتەش، بەسروشتی پیشەكەی، هەموو كەرەستەو پێداویستیو ئامرازێك، لەبابەت ئۆتۆمبێلی ئاوڕژێن، گازی فرمێسكڕێژ، داری كارەبایی، قومبەلەی دووكەڵ، گوللەی لاستیكی، كەلەپچە، جێبـی گولەنەبڕ بۆ گواستنەوەی خێرا، چاودێری لەئاسمانەوە، سەگی پۆلسی، قازیفەی كارەبایی كە لەئەمریكاو بەریتانیا بەكاردێتو كاریگەریی 500 ڤۆڵتی هەیەو چەندین كەرەستەی تر، بەكاردەهێنێت، هەر هەمووشی لەپێناوی ئەوەی، دواجار، فیشەك بەكارنەیەتو لەپێكدادانی هێزە ئەمنییەكانو خۆپیشاندەراندا، قوربانی نەكەوێتەوە.
ئەگەر ئەم رێوشوێنە پێویست نەبوونایە، دەیان وڵاتی دیموكراتیو پیشەسازیی رۆژئاوا ئەو كەرەستانەیان دروست نەدەكردو لەبنەڕەتیشدا دەزگای تایبەتیان دانەدەمەزراند. لەدوای رووداوە خوێناوییەكانی بەهاری عەرەبی، بەشێكی زۆری وڵاتانو بەتایبەتیش ناوچەی رۆژهەڵاتی ناوەڕاست، ئەم جۆرە دەزگایانەو كەرەستەو پێویستییەكانیان بەهێز كرد، چونكە زۆربەی راپەڕینەكانی بەهاری عەرەبی، كە دەتەنینەوەو خوێنیان تێدا دەڕژا، دەرەنجامی نائامادەگیی كولتورێكی سیاسیی دیموكرات بوو لەكاروباری دەوڵەتداریدا. لەناوچەكەی ئێمەدا، تەنها توركیاو ئیسرائیلە، كە لەم جۆرە دەزگایەدا پێشكەوتوون، دەنا زۆربەی وڵاتانی تر، بەكوردستانیشەوە، هێشتا عەقڵییەتی تەقەكردنو كوشتنی خۆپیشاندەریان تێنەپەڕاندووە. ئەمڕۆ حكومەتی هەرێمی كوردستان دەتوانێت بەتەواوەتی خۆی لەم كولتورە دواكەوتووەی مامەڵەكردن لەگەڵ خۆپیشاندەران رزگار بكات، بەتایبەتی كە قەیرانە سیاسیو ئابوورییەكانو چارەسەرنەكردنیان، هەندێجار هاووڵاتیان ناچار بەچوونە شەقامو ناڕەزایی دەربڕین، دەكات.
PM:02:00:24/12/2017
ئهم بابهته 4409
جار خوێنراوهتهوه
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی