‌ئەم هەموو جنێوە بۆ ژنە نووسەرێك دوایی مردنی
PM:03:29:10/10/2020
فەرحان جەوهەر

میللەتێك بەشێكی خوێندەوارەكانی تا ئەو ئاستە جنێو فرۆش بن، مرۆڤ تەنها ئەوەی بۆ دەمێنێتەوە و بڵێت: خودا رەحم بكات، نەك هەر بە ئێمە، بەڵكو بە نەوەی داهاتووش.

دوای بڵاو بوونەوەی هەواڵی مەرگی خانمە ژنی شاعیرو نووسەر مهاباد قەرەداغی لە راگەیاندنەكان و تۆڕە كۆمەڵایەتیەكان، ئیدی وەك ئەوەی هەواڵی مەرگی ترسناكترین بوونەوەری سەر ئەم زەمینە راگەیاندرابێت، بە سەتان و بگرە هەزاران كۆمێنتی پڕجوێن بۆ مەرگی ئەو خانمە ژنە شاعیرو نووسەرو زیندانی سیاسییە نووسرابوون.  كە هەر لە پێناوی ئەو جنێوفرۆشانەدا سەردەمێك گەنجایەتی خۆی لە تێكۆشان و زیندان بردەسەر.

بەشێك لەو كۆمێنتانە بەناوی بەرگری بوون لە ئیسلام و دین، گوایە ئەو ژنە دژی دین بووە و داوای یەكسانی ژن و پیاوی كردووە، هەندێك لە كۆمێنتەكانی تریش پەیوەندیان بە بەشداری ئەو بووە لە دەسەڵات، ئەوەی من بەمەترسی دەبینم نەك لە ئێستادا، بەڵكو لە داهاتووشدا ئەو هەڵە تێگەیشتنە مەترسیدارەیە لە دین لەلایەن بەشێكی زۆری گەنجانی وڵاتەكەمان، ئاخر ئێمە هەر لە منداڵییەوە وا فێركراوین كە دوای مردنی كەسێك، جگە لە رەحمەت بۆ ناردن و بەچاكە باسكردنی هیچ شتێكی خراپی لەبارەوە نەبێژین، ئەگەر لە ژیانی خۆشیدا چەندە خراب بووبێت كە دەڵێم: ئێمە وا فێركراوین مەبەستم هەموو ئەخلاقی كوردەواری وابووە، هەر بەمنداڵی هەموو دایك و بابێكی كوردەواری منداڵەكانییان وا پەروەردە كردونەو پێیانوتوونە: كە مرۆڤ دەمرێت شەیتان ئیدی دەستی لێ هەڵدەگرێت، بۆیە نابێت بەهیچ شێوەیەك بە خراپە باسی كەسی مردوو بكەن، ئەمە ئەخلاقی دینی و كوردەواری بوو، ئەی ئێستا گەنجەكانمان بۆچی دەستبەرداری ئەم ئەخلاقە و ئەم دینە جوانە بوون؟ 

پێموایە ئەو تێگەیشتنە خراپەی ئەمڕۆ لە دین و نەمانی ئەو كولتورە كوردەوارییە جوانەی خۆمان، بەشێكی زۆری پەیوەندی بە پەروەردەی ئیسلامی سیاسی و حزبەكانیانەوە هەیە، دەیانەوێت ئەم تێگەیشتنە دینیە كوردەوارییە لە ناو بەرن، وەك چۆن لە ناویان بردووە، راستە هەموو ئەوانەی ئەو جێنوانە دەدەن ئەندام و لایەنگری حزبە ئیسلامییەكان نین، بەڵام بەنائاگاییەوە بەشێكی زۆر گەنجەكانمان و ئەندامانی حیزبەكانی غەیرە ئیسلامیش كەوتونەتە ژێر هەژموونی ئەو دینە سیاسیەی لایەنە ئیسلامییەكان ، كە سەرچاوە سەرەكییەكەی ئیخوانی مسرو قەتەر و سەلەفییەكانی عەرەبستانی سعودیەن ، ئەمە ئەخلاقی ئیسلامی سیاسییە ، خەڵكی غەیرە خۆیان بەكافر و زەندیق دەزانن و خۆیان زۆر پێ لە خەڵكی تر باشترو ئیسلام ترە ، لە كاتێكدا دینی راستەقینەو دوور لە سیاسەت شتێكی جیاوازترمان پێدەڵێت : ئەویش ئەوەیە تەنها خودای مەزن دەزانێت كێ مان لە كێ باشترین و هەر زاتی ئەعلاش دەزانێت كێ دەچیتە بەهەشت یان دۆزەخ ، ئەوانەی خۆیان پێ لە خەڵك باشترو موسڵمان ترەو بڕیار لەوەدەدەن چ كەسێك بەهەشتی و چ كەسێك دۆزەخییە ، ئەمانە لە هەموو كەسێك زیاتر لای باری تەعالا ناخۆشەویستن.

میللەتانی تر هەر لە دەوروبەرمان نەك باسی ئەوروپا بكەین، چۆن رێز لە رەمزە رۆشنیرو نووسەرو هونەرمەندەكانیان دەگرن، یەك رۆژ پێش مردنی خاتوون مهاباد قەرەداغی ، هونەرمەندی بەناوبانگی ئێرانی شەجەریان مرد كە تا ساتی نووسینی ئەو وتارەش نەنێژراوە، سەیركەن خەڵكی ئەو وڵاتە ئیسلامییەی كە موزیكی حەرامكردووە چ بۆ ئەو هونەرمەندەی خۆیان دەكەن ، بەهەزاران هەزار كەس بێ گوێدانە مەترسی ئەو پەتایە وەك رێزو پەرۆشی بۆ مەرگی شەجەریان كۆبوونەتەوە ، كەس ناپرسێ شەجەریان ئاینداربووە یا بێ ئاین، پیاوی دەوڵەت بووە یا ئۆپۆزسیون ، لای ئەوان گرنگ ئەو خزمەتەیە ‌كە بە هونەر و ناوبانگی میللەتەكەی كردووە ، دە سەیركەن ئەوە لە پێش چاوتانە و دراوسێ تانن ، ئەرێ بەڕاست ئێمە تۆزیك بەسەرخۆماندا ناشكێینەوە ؟ لە بەیانییەوە تا درەنگانی شەو هەر خەریكی جوێندانین بەیەكتر و رۆژی دواتریش هەر ئەو كارە دووبارە دەكەینەوە ، لەگەڵ ئەوەشدا دەزانین هیچ ئەنجامێكیشی نییە و نابێت ، كەسێكیش رۆژانە كارێكی بێ ئەنجام بكات و رۆژی دواتریش هەمان ئەو ئیشە دووبارە بكاتەوە لە شێت زیاتر هیچی تر نییە .



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.