ماكڕۆن پێش عۆن سەردانی شوێنی تەقینەوەكەی كرد

‌فەرحان جەوهەر

لبنان وڵاتێكی گرنگە بەهۆی شوێنی جیۆسیاسیەكەیەوە هەروەها وڵاتێكی فڕانكۆفۆنییە، بۆیە فەڕەنسا بە ئەركی خۆی دەزانێ هاوكاری بكات، بەڵام ئەوەی ئەم وڵاتەی وێران كردووە گەندەڵیی و ململانێی سیاسی و مەزەبی و ئاینییە، بەتایبەتی گەندەڵییەكەی بە جۆرێكە ئەمە چل ساڵە حكومەت ناتوانێ لە هەشت تا دە سەعات زیاتر كارەبا بۆ هاووڵاتیانی خۆی دابین بكات، جگەلەوەی هەر ناوچەیەك بەدەست حیزبێك و كەسێكی دەست رۆیشتووە و حكومەت ناتوانێ رووبەڕوویان ببێتەوە ، بوودجەی سوپا هەمووی بۆ مووچەی سەربازەكانە سیستەمی بەرگریان بێ بوودجەیە ، هەڵبژاردن دەكەن و كەمتر لە رێژەی سەدا بیست بەشداری دەكەن و هەر ئەو حزب و تائیفانە دەسەڵات وەردەگرنەوە ، بەتایبەتی حیزب وڵلا خاوەن میلیشیا و دەسەڵاتی كردەنییە و هەر خۆی بڕیاری شەڕ لەگەڵ ئیسڕائیل دەدات و هەرخۆشی ئاگربڕ رادەگەیێنێ ، شوێنە گرنگەكانی وەك فڕۆكەخانە و بەندەرو دەروازە سنووریەكان بەدەست خۆیەتی .

وڵاتێكی ئەوەندە گەندەڵە بۆتە شوێنی مامەڵەی نایاسایی و سپی كردنەوەی پارە ، سەردەمێك سوریا داگیری كردبوو ئێستاش رۆژانە لەلایەن ئیسڕائیلەوە سەروەریەكەی پێشێل دەكرێ ، بەكورتی وڵاتێكی خاوەن سەروەری نییە ، هەربۆیەش ئەمە پانزە ساڵە دادگای نێودەوڵەتی تاوانەكان لێكۆڵینەوە لە تیرۆركردنی سەرۆك وەزیرانی پێشووتر رەفیق حەریری دەكات ، بۆ ئەم تەقینەوەیەش هەر پەنا دەبەنە بەر لایەنی نێودەوڵەتی خۆیان ناتوانن ئەم كارە بكەن .