بابە برام چەك هەڵگرن، بۆ دیشلەمەخۆرەكانی سیاسەت

‌عەزیز ڕەئووف

 

من دەزانم ئەوەی بە چەك بێت بە چەك نەبێت ناڕوات. دڵنیام لەوەی ئەم هێزانە بەتایبەت پارتی ئەگەر لەسەدا یەكی خەڵكی كوردستانی لەگەڵ بێت، نە كورسی چۆڵ دەكات و دە ئامادەیە بۆ یەك چركەس تەنازول لە دید و تێڕوانین و ئەجێندای خۆی بكات، بەڵام ئەوەش دەزانم خیاری چەكداركردن خراپترین جۆری سیاسەتە لەم چركەساتەدا و گەڕانەوەیە بۆ خاڵی سەرەتا. 

 

یەكێك لە ئیشكالەكانی ئەم كۆمەڵگەیەی ئێمە لە بیستوچوار ساڵی دەسەڵاتی كوردیدا دروستكردنی گروپ و هێزی نەوچەیی بووە. پارچەپارچەكردنی كۆمەڵگە و كوشتنی خەونی دەستەجەمعی و خەونی نەتەوە یەكێك لە ئەجێندا خراپەكانی حزبی كوردی بووە. دروستكردنی هێزێكی چەكدار لە ئێستادا جگە لە پارچەپارچەكردنێكی تر هیچی لێ شین نابێت و هەرێم لە دوو هێزی چەكدارەوە دەكاتە سێ هێز و ئەوەی چەكیشی هەڵگرد زەحمەتە دایبنێت و ئەوەی خەنجەری هەڵكێشا گەڕانەوەی خەنجەر بۆناو كێلان زۆر زەحمەتە.

 

ئیشكالی بزوتنەوەی گۆڕان لە شەش ساڵی ڕابردوودا ئەوە بوو كە نەیدەزانی چی لەم جەماوەرە فراوانە بكات. دەیویست بەبێ قوربانی زۆر شت وەرگرێت. لە میدیاوە پێمان دەڵێت بارزانی دیكتاتۆرە بەڵام ئەگەر دوو منداڵ بەرد بگرنە بارەگاكانی بارزانی دەڵێ من نەبووم. پێنچ سەد هەزار دەنگدەر نەیتوانی خۆپیشاندانێك بكات لانی كەم سەد هەزار كەس بێتە سەر شەقام و فشاری گەورە دروست بكات. دەیان هەزار دەنگ لە هەولێری پایتەخت بەم هەموو پارلەمانتار و مستەشار و وەزیر و گزیرەوە نەیتوانی خۆپیشاندانێك بۆ بەردەم سەفارەتێك بكات، تەنانەت لە ئاستی ناوخۆ و دەرەوەش نەیتوانی قەناعەت بە سەفارەتی وڵاتان بهێنێت كە پارتی ڕەفتاری نادیموكراسی دەكات. لەم دۆخەدا هەر بەرگری و پارتیش هەر هێرشی دەكرد. لە شەڕەبۆكسی ناو پارلەمانەوە تا دادگایكردنی ڕێكخەری گشتی گۆران، پارتی هەر لە هێرش و گۆڕان هەر لە دیفاعدابوو، تا دۆخەكە وای لێهات. ئێستاش باش هاتووە، لانی كەم گۆڕان تەنازولی لە ڕای خۆی نەكردووە، پارتی بەم هەموو ئیمكانەوە نەیتوانیوە یەك كادر، یەك وەزیر یان پارلەمانتارت تەنەزول پێ بكات، باشت هێناوە، ئەوەی نەتتوانیوە بیكەی ئەوەیە كە ناتەوێ لەوانی تر نەچیت. نەتوانی شوێنپێ جێبێڵیت. ئەگینا خەڵك زۆری بۆ كردی و تۆش كەمت بۆ خەڵك كرد. خەڵك هەر ئەوەندەی پێ دەكرێت. تۆ یەكسەر لە خەباتی پارلەمانیەوە باز بدەی بۆ چەكداری بەبێ خۆپیشاندان و مانگرتن و ڕێگەكانی تری خەباتی مەدەنی، ئیتر خەڵك چی بكات. تۆ نەتوانی خوێندەوار دروست بكەیت و دیدی نوێت پێ نەبێت، كادرانی خۆت بە تەفسیر و جیهانبینی نوێ پەرەوەردە نەكەی، ئیتر ڕێگەی تر نیە هەڵگرتنی كوتەك نەبێت، ئەمەش هیچمان دەست ناكەوێت نەتیجەكەی دیارە یان شەڕی ناوخۆ یان دوو ئیدارە وەك چۆن ئێستا لە دوو ئیدارەییدا ژیان دەگوزەرێنین. 

 

زوو دیار بوو شتی گەورەت پێ ناكرا. دەنگە دەنگی بێ بیركردنەوە و تۆپخانەی میدیایی لەجێگەی پەروەردەی سیاسی و گۆڕانی ڕیشەیی تەنها بە قسە، نەتیجەكەی هەر ئەمەی لێ شین دەبێت. تۆ دەبوو لە پەروەردەی سیاسییەوە دەست پێ بكەیت، تەماشای پەكەكە بكە، پەروەردەی ژن و ئینسان و نەتەوە و شەڕ، دیدێكی ترە لە خۆرهەڵاتی ناوەڕاستدا. تۆ بەچۆڵكردنی بارەگاكانی یەكێتی دەتتوانی چی بكەی؟ یەك پارتیم پێ بڵێ بوبێت بە گۆڕان؟ دوای بەشداریكردنت لە حكومەت و تاعینكردنی كادرەكانی نێو ژوور و بازنە و ڕایەڵەكانی خۆت، تەواو سەلماندت هێزێكی وەك هێزەكانی تر، حزبەكان لە دوو هێزەوە بوون بە سێ هێز.  

 

چەك هەڵگرن، بابە برام چەك هەڵگرن. بەخوا سەرە گەورەكانتان چەك هەڵناگرن، وەك چۆن لە خۆپیشاندانەكاندا كوڕی ڕەش و ڕووت پێوە دەبوون، لە هەڵگری چەكیشدا هەر ڕەشو ڕووت باجەكەی دەدەن. وەرن ئابلۆقەی هەولێر بشكێنین، من ئامادەم، كێ دێت دەس هەڵبڕێت، با پارتی بمانكوژێت، نەك منداڵی خەڵك چەكدار بكەین. ئەم دۆخە قوربانی دەوێت، سەردەمی ئیعازی سیاسی و هاندان بەسەرچوو. كێ ئەم دۆخەی بە دڵە با سەری خۆی كز بكات و كێش بە دڵی نیە پێش خەڵكی بكەێت، نەك لە گردێكی بەرزەوە دیشلەمە بخوات و سبەی بڵێ دەستی منی لە پشتەوە نیە.

 

عەزیز ڕەئوف