هه‌په‌گه ژماره‌ی سه‌ربازه كوژراوه‌كانی توركیاو گه‌ریلا شه‌هیده‌كانی بڵاوكرده‌وه
وێستگه نیوز ـ
ناوەندی راگەیاندن و چاپەمەنی هێزەکانی پاراستنی گەل (هەپەگە) رایگەیاند، لە ئەنجامی دوو چالاکی گەریلاکانیانیدا لە حەفتانین 14 سەربازی سوپای تورکیا کوژراون و سێ گەریلاش لە شرناخ شەهید بوون.
هێزەکانی پاراستنی گەل لە راگەیەندراوێکدا باسی لەوەکردووە، رۆژی 7ی تەمموز هێزەکانیان لە دژی یەکەیەکی سەربازی سوپای تورکیا، کە لە گردی قەسرۆکێ جێگیر بووبوون، چالاکیەکیان ئەنجامدا و لەو چالاکیەدا 12 سەرباز کوژران.
ئاماژە بەوەشکراوە، بەرەبەیانی رۆژی 8ی تەمموزیش گەریلاکانیان لە دژی هێزێکی سوپای تورکیا لە ناوچەی شەشدارا دوو چالاکیان ئەنجامدا و لەو دوو چالاکیەشدا دوو سەرباز کوژران.
باسیان لەوەشکردوە، بەڵام لە ناوچەی ماسیرۆ لە هەرێمی شرناخ لە باکووری کوردستان، بەهۆی بۆردومانی هەلیکۆپتەری سکۆرسییەوە سێ گەریلا شەهید بوون، کە یەکێکیان فەرماندەیە.
لە 15ی مانگی رابردوودا، سوپای تورکیا هێرشەکانی بۆ سەر هەرێم فراوان کرد و ناویشی لێناوە ئۆپەراسیۆنی چنگی پڵنگ، بەو هۆیەشەوە لە سنوری پارێزگای دهۆک سوپای تورکیا هێزی تایبەتی جێگیرکردوە.
لەلایەکی دیکەوە، لەسەر هێرشەکانی تورکیا، وەزارەتی دەرەوەی عیراق رایگەیاند، كارتی زۆریان بەدەستەوەیە بۆ ئەوەی بەرامبەر پێشێلكارییەكانی توركیا بەكاری بهێنن، گرنگترینیان كارتی ئابوورییە، هەروەها یاسا نێودەوڵەتییەكانیش دەستەبەری مافی عیراق دەكه‌ن و دەكرێت پەنا بۆ ئەنجومەنی ئاسایشی نێودەوڵەتی ببەن.
هــ. ر
PM:01:52:09/07/2020
ئه‌م بابه‌ته 1260
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت