مەترسی کەمبوونەوەی ئاوی خواردنەوەی سلێمانی چارەسەرکرا
وێستگەنیوز-
پارێزگاری سلێمانی رایگەیاند، دوای ئەوەی ئەمڕۆ بۆڕی سەرەکی دابەشکردنی ئاوی خواردنەوە لە سلێمانی شکا، دەستبەجێ کار بۆ چارەسەرکردنی گرفتەکە کراوە و لە ئێستادا بەشێکی وێستگەکە خراوەتەوە کار و لە سبەینێوە کێشەی زۆر شوێنی سلێمانی چارەسەر دەبێت.
هەڤاڵ ئەبوبەکر، پارێزگاری سلێمانی لە راگەیەنراوێکدا رایگەیاند، بەسوپاسەوە بەهیممەتی بەڕێوەبەرو ئەندازیارو تەکنیکارو کارمەندانی دڵسۆزو خۆنەویستی بەڕێوەبەرێتیی ئاوی سلێمانی و وێستگەی ئاوی سەرچنار، ئەمڕۆ دوای جیاکردنەوەو ڕاگرتنی ئەو بەشانەی زیانیان بەرکەوتووە، دەست بە چاکردنەوەی بۆری سەرەکیی گواستنەوەو دابەشکردنی ئاوی سلێمانی کرا.
ئەوەش هاتوە، بەشێوەیەکی کاتیی و بۆ ئەوەی هاووڵاتیان بێئاونەبن بۆ ماوەیەکی درێژ، جوامێرانە بەشێکی گرنگیی وێستگەکە خراوەتەوە کار و لە سبەینێوە کێشەی زۆر شوێنی سلێمانی چارەسەر دەبێت.
پارێزگاری سلێمانی باسی لەوەشکردوە، دوای تەرخانکردنی بوجەی فریاگوزاریش لە لایەن حکومەتی هەرێمی کوردستان و وەزارەتی داراییەوە کەلەلایەن پارێزگاری سلێمانییەوە داواکراوە، هەوڵی چارەسەرکردنی تەواوی شکان و خستنەوەگەڕی وێستگەو هێڵەکان دەدرێت.
PM:11:16:05/07/2020
ئه‌م بابه‌ته 4680
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت