حكومه‌تی هه‌رێم له‌سه‌ر چاره‌نوسی خوێندنی ئه‌مساڵ كۆده‌بێته‌وه
وێستگه نیوزـ
بریاره ئه‌مڕۆ حكومه‌تی هه‌رێمی كوردستان كۆبونه‌وه‌یه‌ك ساز بكات و گفتوگۆ بكات له‌سه‌ر چەند پرسێكی پەیوەست بە كۆرۆنا و جێبەجێكردنی یاسای چاكسازی و داھاتوی خوێندنی ئەمساڵ.
ئامانج رەحیم، سكرتێری ئەنجومەنی وەزیران، رایگه‌یاند: له كۆبونه‌وه‌كه‌دا چه‌ند پرسێكی تایبه‌ت به رێكاره‌كانی بەرەنگاربونەوەی كۆرۆنا تاوتوێ دەكرێن، لەوانە، چۆنیێتی دابینكردنی موچەی فەرمانبەران و تاوتوێكردنی پڕۆژە بڕیارێك بۆ ھاوكاریكردنی ئەو كاسبكارانەی كە لە ئەنجامی ئەم بارودۆخەدا بەھۆی رێكارەكانی حكومەت زەرەرمەندبوونە و بژێوی ژیانیان لەدەستداوە، وه‌ك كرێی دوكانەكان و كەمكردنەوەی باج.
ئامانج رەحیم، راشیگەیاند: تەوەرێكی دیكەی كۆبوونەوەكە، ئامادەكارییە بۆ خوێندنی ئۆنلاین و وەزیرانی پەروەردە و خوێندنی باڵا پلانی خۆیان دەخەنەڕوو دەربارەی چارەنوسی خوێندنی ئەمساڵ، بۆ ئەوەی حكومەت بەرچاوی روون بێت بۆ خوێندنی ئۆنلاین و ھەنگاوەكانی جێبەجێكردنی و دڵنیابونەوە لەوەی خوێندنی ئەمساڵ نەفەوتێت.
هه‌ر سه‌باره‌ت به یاسای چاكسازی، ئومێد سەباح، سەرۆكی دیوانی ئەنجومەنی وەزیران، ئاشكرایكردوه كه 5ی نیسان یاسای چاكسازی دەكەوێتە بواری جێبەجێكردن و تەوەرێكی كۆبونەوەكەی ئەمڕۆی حكومه‌ت دەركردنی پەیڕەوێكە بۆ جێبەجێكردنی یاسای چاكسازی، بۆ ئەوەی دادپەروەری لە موچە پەیڕەو بكرێت.
ئاشكراشیكرد كه له كۆبونه‌وه‌كه‌دا باس لە كەمكردنەوەی خەرجییەكانی حكومەت و چۆنیێتی زیادكردنی داھات دەكرێت و ھەنگاوەكانی دەستپێكردنەوەی گفتوگۆش لەگەڵ بەغدا تاوتوێ دەكرێن.
AM:08:48:01/04/2020
ئه‌م بابه‌ته 2220
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت