به‌رپرسێكی پێشووی عیراق سزای 7 ساڵ زیندانیی بۆ ده‌ركرا


وێستگه‌ نیوزـ

ده‌سته‌ی ده‌ستپاكیی عیراق رایگەیاند کە دادگای تاوانەکان سزای زیندانی به‌سه‌ر به‌رێوه‌به‌ری گشتیی پێشووی ده‌روازه‌ی سنوریی ره‌بیعه‌ و سێ فه‌رمانبه‌ری ده‌روازه‌كه‌ سەپاندوە، ئەوەش دوای ساغ بوونەوەی تۆمەتەکان بە بردنی نەوتی قاچاغ لەرێگەی تانکەرەوە.

فه‌رمانگه‌ی لێكۆڵینه‌وه‌ له‌ ده‌سته‌ی ده‌ستپاكیی عیراق ئاشكرایكرد كه‌ به‌ڕێوه‌به‌ری ده‌روازه‌ی سنوریی ره‌بیعه‌ و سیان له‌ فه‌رمانبه‌رانی ده‌روازه‌كه‌ له‌ دۆسیه‌ی به‌قاچاغبردنی هه‌زار و 500 تانكه‌ر نه‌وتی خاو تێوه‌گلاون كه‌ به‌هاكه‌ی 17 ملیۆن و 580 هه‌زار و 720 دۆلاره‌.

ئاشكراشیكردوه‌ كه‌ دادگای تاوانه‌كانی به‌غدا كه‌ تایبه‌ته‌ به‌ دۆسیه‌كانی ده‌سته‌ی ده‌ستپاكی گه‌یشتونه‌ته‌ ئه‌و بڕوایه‌ی كه‌ تۆمه‌تباره‌كان كه‌مته‌رخه‌مبوون و دوای پێداچونه‌وه‌ به‌ به‌ڵگه‌كاندا بڕیاری داوه‌ هه‌ر چوار تێوه‌گلاوه‌كه‌ 7 ساڵ زیندانی بكرێن.

دادگای تاوانه‌كانی به‌غدا فه‌رمانی ده‌ستگیركردنی بۆ تۆمه‌تباره‌كان و ده‌ستبه‌سه‌رداگرتنی موڵكه‌ گواستراوه‌ و نه‌گواستراوه‌كانیشیان ده‌ركردوه‌ و مافی به‌لایه‌نی زیانلێكه‌وتوو داوه‌ كه‌ داوای قه‌ره‌بوو بكاته‌وه‌.


AM:11:11:12/02/2020


ئه‌م بابه‌ته 824 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت