په‌رله‌مانتارێك: مووچه‌ی كه‌مئه‌ندامی و خانه‌نشینی زیاد ده‌كات


وێستگه‌ نیوز ـ

په‌رله‌مانتارێكی فراكسیۆنی گۆڕان له‌ په‌رله‌مانی كوردستان رایده‌گه‌یه‌نێت، به‌پێی پڕۆژه‌ یاسای چاكسازی، مووچه‌ی كه‌مئه‌ندامان و خانه‌نشینان زیاد ده‌كات.


دابان محه‌مه‌د، ئه‌ندامی په‌رله‌مانی كوردستان له‌ فراكسیۆنی گۆڕان به‌ وێستگه‌ نیوزی راگه‌یاند: به‌پێی پڕۆژه‌ یاسای چاكسازی كه‌ په‌رله‌مانی كوردستان په‌سه‌ند كرد و ره‌وانه‌ی سه‌رۆكایه‌تی هه‌رێم كراوه‌ بۆ واژوو له‌سه‌ر كردنی، كۆمه‌ڵێك ده‌ستكه‌وتی باشی تیایه‌.

وتیشی: "هه‌ر به‌پێی پڕۆژه‌كه‌ له‌كاتی جێبه‌جێكردنیدا له‌ لایه‌ن حكومه‌ته‌وه‌، مووچه‌ی خانه‌نشینی ئه‌وانه‌ی مووچه‌یان نزمه‌ زیاد ده‌كات، هاوكات مووچه‌ی كه‌مئه‌ندامانیش زیاد ده‌كات".

ناوبراو ئاماژه‌ی به‌وه‌شدا: له‌كاتی گفتوگۆكانی په‌رله‌مان له‌سه‌ر پڕۆژه‌ یاسای چاكسازی، ئه‌گه‌رچی به‌ ده‌قێكی یاسایی جێگیر نه‌كراوه‌ مووچه‌ی كه‌مئه‌ندامی زیاد بكات، به‌ڵام هه‌موان كۆكن له‌سه‌ر زیاد كردنی مووچه‌ی كه‌مئه‌ندامان و یاساكه‌ش له‌پێناو به‌ دیهێنانی دادپه‌روه‌ری له‌ مووچه‌دا ده‌رچوێندراوه‌".





PM:11:10:22/01/2020


ئه‌م بابه‌ته 7908 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت