كونسوڵی ئەمریكا پیرۆزبایی لە یەكێتی دەكات
وێستگە نیوز-
نوسینگەی سەرۆكی ئەنجومەنی باڵای سیاسی و بەرژەوەندی یەكێتیی نیشتمانیی كوردستان ئاشكرایكرد كە "ئێوارەی ئەمڕۆ شەممە ١٨/١/٢٠٢٠ لەشاری هەولێر، كۆسرەت ڕەسول عەلی پێشوازیكرد لە ستیف فەیگن كونسوڵی گشتی ئەمریكا لە هەرێمی كوردستان".
بە پێی راگەیەندراوی كۆبوونەوەكە "لە سەرەتای دیدارەكەدا كونسوڵی ئەمریكا پیرۆزبایی سەركەوتنی كۆنگرەی چوارەمی یەكێتیی لەكۆسرەت ڕەسول كرد".
باس لەوەش دەكات كە لە دیدارێكدا گفتوگۆكرا لەبارەی پەیوەندییەكانی نێوان هەرێم و ئەمریكا، هەردوولا هاوڕابوون لەسەر پەرەپێدانی زیاتری پەیوەندییەكان و هەماهەنگی زیاتر لەنێوان هەردوولا، هەروەك كۆسرەت ڕەسول سوپاسی ئەمریكاو وڵاتانی هاوپەیمانی كرد كە هەمیشە هاوكارو پشتیوانی كورد بوونە.
بەشێكی تری دیدارەكە گفتوگۆكردن بوو لەبارەی دۆخی كوردستان و هەنگاوەكانی چاكسازی لەنێو هێزی پێشمەرگە، هەردوولا گفتوگۆی وردیان كرد لەبارەی هەنگاوەكانی چاكسازی و جەختیان لەوە كردەوە كە دەبێ هەنگاوی جدی بنرێ بۆ ئەم پڕۆسەیەو پشتیوانی خۆیان بۆ دووپاتكردەوە.
پەیوەندییەكانی نێوان هەرێم و بەغدا تەوەرێكی تری دیدارەكە بوو، هەریەك لە كۆسرەت ڕەسول و كونسوڵی ئەمریكا لە هەرێم هاوڕابوون كە گفتوگۆ ببێتە بنەمای كاركردنی نێوان هەرێم و بەغداو سەرجەم كێشەكان بەگفتوگۆ و لە چوارچێوەی دەستوور چارەسەر بكرێن.
پەیوەست بەدۆخی كوردستان كۆسرەت ڕەسول دووپاتی كردەوە كە لە هەموو كات زیاتر پێویستە كورد یەكدەنگ و یەكگوتارو یەكگرتوو بێ.
د.ح
PM:08:07:18/01/2020
ئه‌م بابه‌ته 2864
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت