ترەمپ دەرچوونی هێزەکانی ئەمریکا لە عیراق لەگەڵ بەرهەم ساڵح تاوتوێ دەکات
وێستگە نیوز-
لە کۆڕبەندی ئابوری داڤۆس دۆناڵد ترەمپ و بەرهەم ساڵح پرسی دەرچوونی هێزەکانی ئەمریکا لە عیراق تاوتوێ دەکەن.
کۆڕبەندی ئابوری جیهانی لە ٢١ تا ٢٤ ی ئەم مانگەدا بە بەشداری سەرکردەی وڵاتان لە شاری داڤۆس لە سویسرا بەڕێوەدەچێت.
کەناڵی CBS ی ئەمریکی لە هەواڵنامەی سەرەکی رۆژی هەینیدا لە زاری چەند سەرچاوەیەک لە ئیدارەی کۆشکی سپی-یەوە گواستوویەتیەوە لە ئێستادا لە کۆشکی سپی-دا گفتوگۆ لەبارەی ناوەڕۆکی کۆبوونەوەکە لەگەڵ سەرۆک کۆماری عیراق دەکرێت و کۆشکی سپی ئومێدی هەیە سەبارەت بە بەڕێوەچوونی گفتوگۆ لەبارەی پرسی مانەوەی هێزەکانی ئەمریکا لە عیراق".
پرسی دەرچوونی هێزەکانی ئەمریکا لە عیراق ئەوکاتە سەریهەڵدا کە لە ٢٩ ی ١٢ ی ساڵی ڕابردوو ئەمریکا هێرشی کردە سەر یەکەیەکی حەشدی شەعبی و دواتریش لە ٣ ی ئەم مانگەدا لە ئاکامی هێرشێکی فڕۆکەی بێ فڕۆکەوانی ئەمریکیدا ئەبو مەهدی موهەندیس، جێگری بەرپرسی حەشدی شەعبی و قاسم سولەیمانی، فەرماندەی فەیلەقی قودسی سوپای پاسدارانی ئێراندا لەسەر رێگەی فڕکەخانەی بەغداد کوژران.
دواتر و لە ٥ ی ئەم مانگەدا پەرلەمانی عیراق پڕۆژەبڕیارێکی بۆ دەرچوونی هێزە بیانیەکان لە عیراق و لەناویشیاندا هێزەکانی ئەمریکا پەسەند کرد.
دواتریش ترەمۆ ئەو بڕیارەی ڕەتکردەوەو هەڕەشەی "سەپاندنی سزای بە سەر بەغدادا کرد".
کۆڕبەندی ئابوری جیهانی داڤۆس کۆبوونەوەیەکی ساڵانەی نێردراوە سیاسی و ئابوریەکانی وڵاتانی جیهانە، و بە یەکێک لە گەورەترین رووداوە جیهانیەکان دادەنرێت بۆ سەرکردە سیاسیەکان و بازرگان و نوێنەرانی رێکخراوەکان و ناوەندە ئەکادیمیەکان و کەسایەتیە رۆشنبیرییەکان و بەرپرسی میدیاکان کە لە چالاکیەکانی ئەم کۆڕبەندەدا بەشداری گفتوگۆکان دەکەن.
ش . ر
PM:12:14:18/01/2020
ئهم بابهته 2312
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت