بەرهەم ساڵح بەشداری كۆبونەوەی گشتی نەتەوە یەكگرتووەكان دەكات
بەرهەم ساڵح، سەرۆككۆماری عێراق
وێستگە نیوز-
نوسینگەی ڕاگەیاندنی سەرۆكایەتی كۆمار ڕایدەگەیەنێت، بەرهەم ساڵح بەشداری لە كۆبونەوەی نەتەوەیەكگرتووەكان دەكات كە بڕیارە لە شاری نیویۆركی پایتەختی ئەمریكا بەڕێوەدەچێت.
لەڕاگەیەنراوەكەدا ئاماژە بە نوسینێكی مۆنیتەر كراوە كە دەڵێت"سێشەممەی داهاتوو (24 ی ئەیلولی 2019)، بەئامادەبوونی 74 سەرۆكی وڵاتانی جیهان و 193 وەزیری وڵاتانی ئەندامی نەتەوە یەكگرتووەكان، كۆبوونەوەی كۆمكاری گشتی نەتەوە یەكگرتووەكان لە شاری نیویۆركی پایتەختی ئەمریكا بەڕێوەدەچێت".
"سەرەڕای تاوتوێكردنی پرسی وڵاتانی هیند و پاكستان و سزا سەپێنراوەكانی ئەمریكا بۆ سەر كوبا و فەنزەوێلا و كێشەی ئەتۆمی كۆریای باكور و دەرچوونی بەریتانیا لەئەوروپا و كێشەی عەرەب ئیسرائیل و قەیرانی تیرۆر… گرژییەكانی ئێران و ئەمریكا و سعودیە و كێشەكانی ناوچەی ئارام و چەند پرسێكی تایبەت بە عێراق بەشێكی تری تەوەری كۆبونەوەكە دەبن، چاوەڕوان دەكرێت هەر یەكە لە دكتۆر بەرهەم ساڵح سەرۆككۆماری عێراق و رەجەب تەیب ئەردۆغان سەرۆككۆماری توركیا، ڕۆڵی بەرچاویان لەو كۆبوونەوەیەدا هەبێت" ڕاگەیەنراوەكە وای وت.
دەشڵێت"مۆنیتەر لەوتارێكیدا لەبارەی كۆبوونەوەی لوتكەی سەركردەكانی وڵاتان، كە لەمیانی كۆبوونەوەی فەرمی نەتەوە یەكگرتووەكاندا لەئەمریكا بەڕێوە دەچێت، ئاماژەی بۆ ئەوە كردووە، پێویستە تیشك بخرێتە سەر ڕۆڵی دوو سەرۆكی ناوچەكە و جیهان، بەرهەم ساڵح و رەجەب تەیب ئەردۆگان".
هەر بەپێی ڕاگەیەنراوەكە، مۆنیتەر باسی لەوەش كردووە، ترەمپ و ئەردۆگان پێش وادەی كۆتایی بۆ ڕاگەیاندنی ناوچەی ئارام لەسوریا، دیدار ئەنجامدەدەن، هەروەها بەرهەم ساڵحیش دیدی سیاسی عێراق و ناوچەكە دەخاتە ڕوو.
"مۆنیتەر ئەوەشی ڕوونكردۆتەوە، بێ ئەوەی لەبایەخی پرسەكانی تری كۆبوونەوەكەی نەتەوە یەكگرتووەكان كەمبكرێتەوە، رۆڵی ئەو دوو سەرۆكە لەچاوەڕوانیدا دەبێت بەهۆی ئەوەی هەردووكیان لەدوو وڵاتەوە دەچنە نیویۆرك كۆمەڵێك بەرژەوەندی و ئامانج و ئاڵێنكاری وڵاتەكانیان و ڕۆڵیشیان لەسەر ئاستی ناوچەكە باس دەكەن".
لەكۆتای ڕاگەیەنراوەكەشدا هاتووە"لەكۆبوونەوەكەی لوتكەی نەتەوە یەكگرتووەكاندا، بەرهەم ساڵح، سەرۆككۆماری عێراق ڕۆڵی تەنها لەسەر ئاستی وڵاتەكەی نابێت، بەوپێیەی عێراق لەهێڵی پێشەوەی ڕوودان و بەرزبونەوەی هەر گرژی و ئاڵۆزییە كە گەر لەنێوان سەربازانی ئەمەریكاو سعودیەو ئێراندا لەدوای روداوی هێرشكردنە سەر كۆمپانیای نەوتی ئارامكۆی سعودییە بكەوێتەوە".
PM:08:21:21/09/2019
ئهم بابهته 2384
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت