شاره‌وانی سلێمانی له‌ باره‌ی وه‌رگرتنی ئه‌م پاره‌یه‌ لە پارکی هەواری شار روونكردنه‌وه‌ ده‌دات

‌دەروازەی پارکی هەواری شار.. فۆتۆ: ئەرشیڤ

وێستگه‌ نیوز ـ هه‌ستیار

سه‌رۆكایه‌تی شاره‌وانی سلێمانی له‌سه‌ر وه‌رگرتنی بڕی 500 دینار له‌ هه‌ر ئۆتۆمبێلێك كه‌ داخڵی پاركی هه‌واری شار ده‌بێت روونكردنه‌وه‌ ده‌دات و هۆكاری وه‌رگرتنی ئه‌و پاره‌یه‌ روونده‌كاته‌وه‌.


كاسترۆ مه‌عروف، سه‌رۆكی لیژنه‌ی كشتوكاڵ و ئاودێری و دارایی و كارگێڕی له‌ ئه‌نجومه‌نی پارێزگای سلێمانی به‌ وێستگه‌ نیوزی راگه‌یاند: "لیژنەکەمان داوای روونکردنەوەی لەسەرۆکایەتی شارەوانی سلێمانی كردووه‌ سەبارەت بەوەرگرتنی بڕی ئەو 500 دینارەی کە لە ھەر ئۆتۆمبێلێک وەردەگیرێت کە داخلی ھەواری شار دەبن".


وتیشی: "تێبینیمان لەسەر وەرگرتنی ئەو پارەیە هەیە، کێ وەریدەگرێت مانگانە چەند وەردەگیرێت وبە چ رێگەیەک بۆ مەبەستی خزمەتگوزاری پارکەکە خەرج دەکرێت".

لای خۆیه‌وه‌ ئاكۆ عه‌لی، جێگری سه‌رۆكی شاره‌وانی سلێمانی به‌ وێستگه‌ نیوزی راگه‌یاند: به‌پێی گرێبه‌ستێك كه‌ له‌گه‌ڵ كۆمپانیایه‌كدا كراوه‌، گه‌راجی وه‌ستانی ئۆتۆمبێله‌كانی پاركی هه‌واری شار به‌گرێبه‌ست دراون به‌ كۆمپانیا بۆ ئه‌وه‌ی له‌ به‌رانبه‌ر راگرتنی هه‌ر ئۆتۆمبێلێك بڕه‌ پاره‌یه‌ك وه‌ربگرن.

راشیگه‌یاند: به‌شێكی له‌و پاره‌یه‌ی له‌ كاتی داخڵبوونی ئۆتۆمبێله‌كان وه‌رده‌گیرێت بۆ پاكردنه‌وه‌ی هه‌واری شارو چاودێری كارمه‌نده‌نكانی پاككه‌ره‌وه‌و خزمه‌تگوزاری و چاككردنه‌وه‌ی ئه‌و خزمه‌تگوزارییانه‌ خه‌رج ده‌كرێت.

ئه‌وه‌شی خسته‌ڕوو: ئه‌و ئۆتۆمبێلانه‌ی له‌ قه‌راغی شۆسته‌كان راده‌گیرێن پاره‌یان لێوه‌رناگیرێت، ته‌نها ئه‌وانه‌ نه‌بێت كه‌ ده‌چنه‌ گه‌راجه‌كانه‌وه‌ ده‌بێت له‌ به‌رانبه‌ر مانه‌وه‌یان پاره‌ بده‌ن.


AM:11:07:16/09/2019






ئه‌م بابه‌ته 6000 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت