لێدوانی په‌كه‌كه‌ له‌سه‌ر هێرشه‌كه‌ی ئه‌مڕۆی هه‌ولێر


وهێستگه‌ نیوزـ

به‌رپرسی راگه‌یاندنی هێزه‌كانی پاراستنی گه‌ل (هه‌په‌گه‌) ره‌تیكرده‌وه‌ هیچ په‌یوه‌ندییان به‌ هێرشه‌كه‌ی دوانیوه‌ڕۆی ئه‌مڕۆی شاری هه‌ولێره‌وه‌ هه‌بێت كه‌ تیایدا جێگری كونسوڵی گشتیی توركیا و دوو ئه‌ندامی دیكه‌ی كونسوڵخانه‌كه‌ كوژران.

سایتی روسیا توده‌ی بڵاویكرده‌وه‌: دیار ده‌نیر، به‌رپرسی راگه‌یاندنی هێزه‌كانی پاراستنی گه‌ل -هه‌په‌گه‌ – باڵی سه‌ربازیی په‌كه‌كه‌ ره‌تیكردوه‌ته‌وه‌ هیچ په‌یوه‌ندییه‌كیان به‌ هێرشه‌كه‌ و كوژرانی جێگری كونسوڵی گشتیی توركیا له‌ هه‌ولێره‌وه‌ هه‌بێت.

به‌رپرسی راگه‌یاندنی هێزه‌كانی پاراستنی گه‌ل به‌ سایته‌كه‌ی رایگه‌یاندوه‌: "هیچ زانیارییه‌كمان له‌سه‌ر هێرشه‌كه‌ نییه‌".

ئه‌وه‌ش له‌كاتێكدایه‌ كه‌ ئاژانسی خه‌به‌ر تورك په‌كه‌كه‌ی به‌ ئه‌نجامدانی ئه‌و هێرشه‌ تۆمه‌تباركردوه‌ و ئاماژه‌ی به‌وه‌داوه‌ كه‌ پێده‌چێت هێرشه‌كه‌ له‌لایه‌ن چه‌كدارانی پارتی كرێكارانی كوردستانه‌وه‌ ئه‌نجام درابێت.

ئاژانسی خه‌به‌ر تورك بڵاویكرده‌وه‌ كه‌ روداوه‌كه‌ دوانیوه‌ڕۆی ئه‌مڕۆ رویداوه‌ و هێرشبه‌ره‌كان به‌ ده‌مانچه‌ی بێده‌نگ ته‌قه‌یان له‌ كارمه‌ندانی كونسوڵخانه‌ی توركیا كردوه‌ و به‌پێی زانیارییه‌ سه‌ره‌تاییه‌كان، ده‌ستبه‌جێ یاریده‌ده‌ری كونسوڵی گشتیی توركیا له‌ هه‌ولێر گیانی له‌ده‌ستداوه‌ و دوانی دیكه‌ش برینداربوون كه‌ باری ته‌ندروستییان ناجێگیره‌.

دوانیوه‌ڕۆی ئه‌مڕۆ چوارشه‌ممه‌ 17ی ته‌مموزی 2019، لە نزیک کونسوڵخانەی تورکیا لە شاری هەولێر تەقە کراو بەپێی زانیارییەکان تائێستا سێ كه‌س كوژراون و 4ی دیكه‌ش برینداربوون، باس له‌وه‌ش ده‌كرێت كه‌ جێگری کونسوڵی تورکیا له‌نێو كوژراوه‌كاندایه‌.

بەپێی میدیاکانی نزیک لە پارتی دیموكراتی كوردستان "چوار کارمەندی کونسوڵخانەی تورکیا بۆ نان خواردنی نیوەڕۆ چوونەتە چێشتخانەی ( ئۆك باز)ی نزیك ئێمپایەر ستی لە شاری هەولێر، بەڵام لەلایەن دوو چەکدارەوە تەقەیان لێکراوە".


PM:03:42:17/07/2019


ئه‌م بابه‌ته 20828 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت