لیژنه‌ هاوبه‌شه‌كان: نوقڵی‌ كاندی مه‌كڕن

وێستگه‌ نیوز -
به‌هۆی ده‌ستكاری كردنی لێبڵه‌كه‌یه‌وه‌‌، لیژنه‌ هاوبه‌شه‌كانی‌ قایمقامیه‌تی‌ سلێمانی‌ ده‌ست به‌سه‌ر جۆره‌ شیرینییه‌كدا ده‌گرن و داواش له‌هاوڵاتیان ده‌كه‌ن ئه‌وجۆره‌‌ نه‌كڕن.

به‌گوێره‌ی‌ راگه‌یه‌ندراوێكی‌ قایمقامیه‌تی‌ سلێمانی‌، لیژنه‌ی كۆگاكانی سه‌ربه‌لیژنه‌ هاوبه‌شه‌كانی قایمقامیه‌ت ده‌ستی به‌سه‌ر جۆره‌ شیرینیه‌ك (نوقڵ)دا گرتووه‌ كه‌ ‌ناوی كاندی-یه‌ و له‌وڵاتی توركیاوه‌ هاورده‌كراوه‌،‌‌ خاوه‌نه‌كه‌ی ده‌ستكاری لیبڵه‌كه‌ی كردووه‌ و ماوه‌ی به‌سه‌رچوونه‌كه‌ی به‌ له‌زگه‌ درێژكردۆته‌وه‌‌.

قایمقامیه‌تی‌ سلێمانی‌ ده‌ڵێت: "ده‌ستكاری كردنی لیبڵی كاڵاوشمه‌كه‌كان له‌لایه‌نه‌ دوكاندار و بازرگانه‌كانه‌وه‌ به‌ فێڵی بازرگانی (غش تجاری) ئه‌ژمار ده‌كرێت و یاسا سزای بۆ دیاریكردووه‌".

له‌ راگه‌یه‌ندراوه‌كه‌دا لیژنه‌ی كۆگاكان داوا له‌هاوڵاتیانی شاری سلێمانی ده‌كات ئه‌م جۆره‌ شیرینه‌ نه‌كڕن و  له‌كاتی هه‌بونی ئه‌م جۆره‌ شیرینه له‌دوكان و بازاڕه‌كاندا له‌ڕێی ژماره‌ ته‌له‌فۆنی (07708677777) لیژنه‌ هاوبه‌شه‌كانی لێ ئاگادار بكه‌نه‌وه‌.

راشیگه‌یاندووه‌ كه‌ به‌فه‌رمانی قایمقامی سلێمانی ئه‌و بڕه‌ شیرینیه‌ی ده‌ستی به‌سه‌ردا گیرا له‌ناوده‌برێت و به‌پێی جۆری سه‌رپێچیه‌كه‌ش خاوه‌نی كۆگاگه‌‌ روبه‌ڕووی رێكاری یاسایی ده‌كرێته‌وه‌.‌

AM:09:49:21/05/2019

ئه‌م بابه‌ته 19424 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت