عەبدولمەهدی: پەیوەندییەکانی بەغدا و هه‌رێم لە باشترین حاڵەتدایە
عادل عەبدولمەهدی
وێستگه نیوز ـ
عادل عەبدولمەهدی، سەرۆک وەزیرانی عیراق رایگەیاند، پەیوەندییەکانی نێوان هەرێمی کوردستان و بەغدا بەرەو ئاسایی بوونەوە دەچێت و بەشێکی زۆری کێشەکان چارەسەر کراون و لە باشترین حاڵەتدایە.
لە کۆنگرەیەکی رۆژنامەوانی هاوبەشدا لەگەڵ ئیمانوئێل ماکرۆن سەرۆکی فەرەنسا لە پاریس، سەرۆک وەزیرانی عیراق دەربارەی پەیوەندییەکانی نێوان بەغدا و هەرێمی کوردستان رایگەیاند، پەیوەندییەکانیان لە باشترین حاڵەتدایە، بەڵام ئەوەش بە مانای ئەوە نییە کە ناکۆکی و جیاوازی نییە لە بیرو بۆچوونەکاندا.
سەرۆک وەزیرانی عیراق ئاماژەی بەوەکرد، ئەو ناکۆکیانەش خراونەتە چوارچێوەی چارەسەرکردنەکانەوە.
عادل عەبدولمەهدی جەختیکردەوە، لەگەڵ هەرێمی کوردستان لە رێگەی گفتوگۆ و لێکتێگەیشتنەوە دەتوانن بگەنە چارەسەری گونجاو لەسەر کێشەکانی شنگال و نەینەوا و دۆسیەی نەوت.
لە بەشێکی تری وتەکانیدا سەرۆک وەزیرانی عیراق ئاماژەی بەوەشکردن لەگەڵ هەرێمی کوردستان لە بابەتی دەروازە سنورییەکان گەیشتوونەتە رێککەوتن و بۆ یەکەمجارە لە دوای ساڵی 1990وە لە سەرانسەری عیراقدا کار بە یەک تاریفەی گومرک دەکرێت.
ئەوەش لە کاتێکدایە، ئەمڕۆ هەینی 3ی ئایاری 2019، عادل عەبدولمەهدی سەرۆک وەزیرانی عیراق بە سەردانێکی فەرمی گەیشتە پاریسی پایتەختی فەرەنسا و لەگەڵ سەرۆکی فەڕەنسا و لێپرسراوانی باڵای ئەو وڵاتە و کۆمپانیا زەبەلاحەکانی فەرەنسادا کۆبۆوە.
لە چوارچێوەی سەردانەکەی بۆ وڵاتانی ئەوروپا، رۆژی چوارشەممە 1ی ئایاری 2019، سەرۆک وەزیرانی عیراق گەیشتە ئەڵمانیا و لەگەڵ کۆمپانیای سیمنیسی ئەڵمانی بە بڕی 14 ملیار دۆلار رێککەوتنێکی چوارچێوەی کارکردنیان ئیمزاکردووە بە تایبەت لە بواری کارەبا و وزەدا.
هــ. ر
PM:03:19:03/05/2019
ئه‌م بابه‌ته 6492
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت