بافڵ تاڵەبانی: هەرێم لە قەیرانێکی ئاڵۆزدایە
بافڵ تاڵەبانی
وێستگە نیوز-
بافڵ تاڵەبانی ڕایگەیاند قەیرانێکی ئاڵۆزی دارایی لە هەرێمی کوردستان هەیە و ئاماژەی بەوەکردووە قەیرانەکە پەیوەستە بە نرخی نەوت و پەیوەندی هەرێم لەگەڵ بەغدا و وڵاتانی دراوسێ، جەختیشیکردەوە دەبێت پشتبەستن بە داهاتی نەوت کەمبکرێتەوە.
بافڵ تاڵەبانی چاوپێکەوتنێکی لەگەڵ کەناڵی بی بی سی ئەنجامداوە کە ئەمشەو کاتژمێر 8:30 پەخشدەکرێت و کەناڵەکە ناوبراوی بە ئەندامی سەرکردایەتی یەکێتی نیشتمانیی کوردستان ناساندووە.
بافڵ تاڵەبانی ڕایگەیاندووە هەرێمی کوردستان بە قەیرانێکی دارایی سەخت و ئاڵۆزدا تێدەپەڕێت و قەیرانەکەش پەیوەندی بە چەند پرسێکەوە هەیە.
ناوبراو لە چاوپێکەوتنەکەدا ئاماژەی بەوەکردووە قەیرانی دارایی هەرێم پەیوەستە بە هەرزانبوونی نرخی نەوت و پەیوەیدنی هەرێم لەگەڵ بەغدا و وڵاتانی دراوسێدا.
بافڵ تاڵەبانی بۆ چارەسەرکردنی ئەو قەیرانە بە پێویستی دەزانێت پشتبەستن بە داهاتی نەوت وەکو تاکە سەرچاوەی داهات کەمبکرێتەوە و ئاماژەی بەوەکردووە گرنگی بە سەرچاوەکانی تری وەکو کشتوکاڵ و گەشتیاری بدرێت.
سەبارەت بە ئەنجامدانی ڕیفراندۆم بافڵ تاڵەبانی ئاماژەی بەوەکردوە نابێت سەرزەنشتی لایەنێکی دیاریکراو بکرێت، پارتی دیموکراتی کوردستان و یەکێتی نیشتیمانیی کوردستان و بزوتنەوەی گۆڕانیش، هەموان هاوبەشن لەو بڕیارە هەڵەیەی کە درا.
ناوبراو جەختیشیکردەوە: كورد مافی خۆیەتی ریفراندۆم ئەنجامبدات، بەڵام تێبینی لە کاتی ئەنجامدانیدابوو، دەبێت بپرسین ئایا كاتی ئەنجامدانی ریفراندۆم گونجاو بوو؟ ئایا كورد بەپێی پێویست لەناوخۆیدا یەكگرتوو بوو؟
PM:01:29:20/01/2019
ئهم بابهته 5792
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت