به‌وێنه..ئاسه‌واری بۆردومانه‌كانی توركیا بۆسه‌ر كه‌مپی مه‌خمور
ئاسەواری بۆردومانەکە
وێستگه نیوزـ
شەوی پێنجشه‌ممه 13ی كانونی یه‌كه‌می 2018، فڕۆکە جەنگییەکانی تورکیا چەند شوێنێکیان لە سنوری مەخمور و شنگال بۆردومانکرد و شەهید و برینداری لێ کەوتەوە، بەرەبەیانی ئەمڕۆش لەگەڵ خۆرهەڵهاتن، شوێنەوارەکانی بۆردوومانەکە دەرکەوتن.
بۆردومانەکان بۆ سەر کەمپی ئاوارەکانی باکوری کوردستان و گەریلاکانی پارتی کرێکارانی کوردستان (پەکەکە) بووە لە سنوری مەخمور و شەنگال، لە ئەنجامیشدا چوار ژنی نیشتەجێی کامپی پەنابەرانی شەهید ڕۆستەم جودی لە مەخمور شەهیدبوون کە سیانیان ئەندامی یەک خێزانن.
هه‌ر ئه‌مڕۆ وه‌زاره‌تی دره‌وه‌ی عیراق له به‌یاننامه‌یه‌كدا رایگه‌یاندوه كه فاتح یه‌ڵدز، باڵیۆزی توركیای له عیراق بانگهێشت كردوه و له‌پای دوباره‌بونه‌وه‌ی پێشێلكارییه‌كان و به‌زاندنی سنوری ئاسمانیی عیراق نامه‌یه‌كی ناڕه‌زایی داوه‌تێ.
له به‌یاننامه‌كه‌دا وه‌زاره‌تی ده‌ره‌وه‌ی عیراق رایگه‌یاندوه كه وه‌زاره‌ت ئیدانه‌ی ئه‌و هێرشانه‌ی توركیا و به‌زاندنی سنوری عیراق و به‌ئامانجگرتنی چه‌ندین ناوچه‌ی چیای شنگال و مه‌خمور ده‌كات كه زیانی گیانی و ماڵیی به‌دواوه بووه.
وه‌زاره‌تی ده‌ره‌وه‌ی عیراق راشیگه‌یاندوه ئه‌و جۆره كارانه پێشێلكردنی سه‌روه‌ریی عیراق و ده‌ستبردنه بۆ ئاسایشی هاوڵاتیانی عیراق، ئه‌مه‌ش به‌هه‌موو جۆرێك كارێكی مایه‌ی ره‌تكردنه‌وه‌یه و له‌گه‌ڵ بنه‌ماكانی هاوسێیه‌تی یه‌كناگرێته‌وه.
هاوكات وه‌زاره‌تی ده‌ره‌وه‌ی عیراق دژایه‌تیی خۆشی ده‌ربڕیووه بۆ به‌كارهێنانی خاكی عیراق وه‌ك باره‌گا و شوێنی ئه‌نجامدانی كرده‌وه‌ی سه‌ربازی كه ئاسایشی وڵاتانی دراوسێ بخاته مه‌ترسییه‌وه.
PM:09:26:14/12/2018
ئه‌م بابه‌ته 2184
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت