‌ئەو کەسەی لە زه‌ماوه‌نده‌کە تەقەی کرد دەستگیر کرا

وێستگه‌ نیوز -

فه‌رمانده‌ی هێزی پۆلیسی پارێزگای كرماشان رایگه‌یاند كه‌ ئه‌و كه‌سه‌ ده‌ستگیركرا كه‌ له‌ گه‌ڕه‌كێكی‌ شاره‌كه‌ زه‌ماوه‌ندێكی‌ كرد به‌ شین و تیایدا 30 كه‌س كوژران و برینداربوون.

شه‌وی چوارشه‌ممه‌ 5ی كانونی یه‌كه‌می 2018، له‌ ناو زەماوەندێک لە شاری كرماشان-ی رۆژهه‌ڵاتی‌ كوردستان زەماوەندێک بوو بە شین و بەهۆی شه‌ڕه‌ ته‌قه‌وە 4 كه‌س كوژران و 26ی دیكه‌ش برینداربوون.

ئه‌مڕۆ شه‌ممه‌ 8ی‌ كانوونی‌ یه‌كه‌می‌ 2018  سه‌ردار مه‌نووچه‌هر ئه‌مانوڵاهی فه‌رمانده‌ی هێزی پۆلیسی پارێزگای كرماشان له‌ لێدوانێكدا بۆ میدیاكانی‌ ئێران وتی: "بكوژه‌ ته‌قه‌ كه‌ره‌كه‌ی زه‌ماوه‌نده‌ خوێناوییه‌كه‌ی كرماشان ده‌ستگیر كراوه‌".

وتیشی: "بكوژه‌كه‌ بۆ شاری مه‌لاردی پارێزگای ئه‌لبورز هه‌ڵاتبوو  و به‌ هۆشیاری پۆلیس و هه‌ماهه‌نگی ده‌زگای قه‌زا به‌یانی ئه‌مڕۆ شه‌ممه‌ ده‌ست به‌سه‌ر كرا".

له‌ شارۆچكه‌ی چه‌مه‌نی كرماشان له‌ ئاهه‌نگێكی بووك گواستنه‌وه‌دا 30 كه‌س كوژران و بریندار بوون.

یه‌كێك له‌ میوانان كه‌ پێشینه‌ی شه‌ڕ و كوشتن و تێكده‌ریی هه‌بووه‌، پاش شه‌ڕ و پێكدادان له‌گه‌ڵ چه‌ند كه‌سێكی‌ میوانی‌ ئاهه‌نگه‌كه‌ به‌ كڵاشینكۆف ته‌قه‌ی كرد و به‌وهۆیه‌وه‌ ئه‌و ژماره‌ قوربانییه‌ی‌ لێكه‌وته‌وه‌.



PM:10:38:08/12/2018


ئه‌م بابه‌ته 2916 جار خوێنراوه‌ته‌وه‌‌