ناوه‌ڕۆكی كۆبونه‌وه‌كه‌ی هۆتێل بابل ئاشكرا ده‌بێت


وێستگه‌ نیوزـ

ئه‌ندامێكی ره‌وتی حیكمه‌ی نیشتمانی به‌ سه‌رۆكایه‌تیی عه‌ممار حه‌كیم دیارترین ته‌وه‌ره‌كانی كۆبونه‌وه‌ی سه‌ركرده‌كانی ئیئتلافی (چاكسازی و ئاوه‌دانكردنه‌وه‌)ی ئاشكراكرد كه‌ له‌ هۆتێل بابل-ی به‌غدا ساز ده‌كرێت.

عه‌بدوڵا زه‌یدی، ئه‌ندامیی ره‌وتی حیكمه‌ی نیشتمانی رایگه‌یاند كه‌ ئه‌مشه‌و سه‌ركرده‌كانی ئیئتلافی (چاكسازی و ئاوه‌دانكردنه‌وه‌) له‌ هۆتێل بابل له‌ به‌غدای پایته‌خت كۆده‌بنه‌وه‌ و سه‌ره‌كیترین ته‌وه‌ری كۆبونه‌وه‌كه‌ش، دیاریكردنی چه‌ند ببنه‌ما و پێوه‌رێكه‌ بۆ كه‌سایه‌تیی سه‌رۆك كۆماری داهاتووی عیراق كه‌ ئه‌وان پشتیوانیی لێ بكه‌ن.

وتیشی ته‌وه‌رێكی دیكه‌ی كۆبونه‌وه‌كه‌ ئاراسته‌كردنی په‌یامێكه‌ بۆ ئه‌و لایه‌نانه‌ی گره‌ویان له‌سه‌ر هه‌ڵوه‌شاندنه‌وه‌ی ئیئتلافه‌كه‌ كردوه‌ و پێیان ده‌ڵێن كه‌ هێشتا ئه‌و ئیئتلافه‌ یه‌كگرتوه‌ و به‌ ئاماده‌بونی سه‌رجه‌م سه‌ركرده‌كانی كۆبونه‌وه‌ی خۆی ده‌كات.

ئه‌مه‌ جگه‌له‌وه‌ی له‌و كۆبونه‌وه‌یه‌دا چه‌ند ببنه‌ما و پێوه‌رێك بۆ كه‌سایه‌تیی سه‌رۆك وه‌زیرانی داهاتووی عیراق و به‌رنامه‌ی حكومی داده‌نرێت تا كابینه‌ی داهاتوو كاری له‌سه‌ر بكات.

له‌ دیارترین ئاماده‌بوانی كۆبونه‌وه‌كه‌، حه‌یده‌ر عه‌بادی، سه‌رۆكی ئیئتلافی نه‌سر و ئه‌حمه‌د سه‌در له‌ ئیتئلافی سائیرون و عه‌ممار حه‌كیم، سه‌رۆكی ره‌وتی حیكمه‌ و ئه‌یاد عه‌لاوی، سه‌رۆكی ئیئتلافی وه‌ته‌نییه‌ و ساڵح موتڵه‌گ، ئه‌مینداری گشتی به‌ره‌ی دیالۆگی عیراقی و ئه‌رشه‌د ساڵحی، سه‌رۆكی به‌ره‌ی توركمان و خالد عوبێدی، سه‌رۆكی لیستی ئیئتلافی نه‌سر له‌ شاری موسڵ.


PM:10:11:23/09/2018


ئه‌م بابه‌ته 11206 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت