‌وه‌زاره‌تی ده‌ره‌وه‌ی عیراق به‌یاننامه‌یه‌كی سه‌باره‌ت به‌ سزاكانی سه‌ر ئێران بڵاوكرده‌وه‌

وێستگه‌ نیوزـ

له‌ رۆژی سێشه‌ممه‌ 7ی ئابی 2018ه‌وه‌، ده‌ستكرا به‌ جێبه‌جێكردنی سزاكانی ئه‌مریكا به‌سه‌ر ئێراندا، وه‌زاره‌تی ده‌ره‌وه‌ی عیراقیش رایگه‌یاند كه‌ سه‌پاندنی سزا به‌سه‌ر هه‌ر ده‌وڵه‌تێكدا ره‌تده‌كاته‌وه‌.

ئه‌حمه‌د مه‌حجوب، وته‌بێژی فه‌رمیی وه‌زاره‌تی ده‌ره‌وه‌ی عیراق له‌ به‌یاننامه‌یه‌كاد رایگه‌یاند: عیراق بنه‌مای سه‌پاندنی گه‌مارۆ به‌سه‌ر هه‌ر ده‌وڵه‌تێكدا ره‌تده‌كاته‌وه‌ كه‌ به‌هۆیه‌وه‌ به‌پله‌ی یه‌كه‌م هاوڵاتیان زه‌ره‌مه‌ند ده‌بن.

وتیشی: عیراق هه‌ڵوێسته‌ جوامێره‌كانی ئێرانی له‌بیرماوه‌ كه‌ له‌كاتی قه‌یرانه‌كاندا پشتیوانی بوه‌، بۆیه‌ هه‌ركات وڵاتێك زیانی پێ بگات، كاریگه‌ریی خراپ له‌سه‌ر ئاسایش و ئارامیی سه‌رجه‌م ناوچه‌ك ده‌كات.

ئه‌حمه‌د مه‌حجوب راشیگه‌یاند: وه‌زاره‌تی ده‌ره‌وه‌ ستایشی هه‌ڵوێسته‌كانی كۆماری ئیسلامی به‌رامبه‌ر عیراق ده‌كات له‌ روبه‌ڕوبونه‌وه‌ی تیرۆر، بۆیه‌ داوا له‌ كۆمه‌ڵی نێوده‌وڵه‌تی ده‌كات فشاری خۆیان بكه‌ن تا ئیداره‌ی ئه‌مریكا له‌ سه‌پاندنی سزا به‌سه‌ر ئێراندا بوه‌ستێنن.

وته‌بێژه‌كه‌ی وه‌زاره‌تی ده‌ره‌وه‌ی عیراق ئه‌وه‌شی دوپاتكردوه‌ته‌وه‌ كه‌ كاردانه‌وه‌ی ئه‌و سزایانه‌ كاریگه‌ریی گه‌وره‌ی ئابوری و كۆمه‌ڵایه‌تیی له‌سه‌ر عیراق و ناوچه‌كه‌ ده‌بێت، چونكه‌ ئێران له‌ روی جوگرافییه‌وه‌ وڵاتێكی دراوسێی گرنگه‌.

 سه‌ره‌ڕای بانگه‌وازی هاوپه‌یمانه‌كانی ئه‌مریكا، به‌ڵام واشنتن سزای نوێی به‌سه‌ر ئێراندا سه‌پاند و رۆژی دووشەممە 6ی ئابی 2018، ترەمپ واژووی لەسەر گەڕاندنەوەی سزاکانی سەر ئێران کرد و رۆژی سێشه‌ممه‌ 7ی ئابی 2018، تره‌مپ دوایین هەڵوێستی لەسەر ئەو بڕیارەی راگەیاند و سزاكانی سه‌ر ئێرانی واژوو كرد و خستییه‌ بواری جێبه‌جێكردنه‌وه‌.

سەرۆکی ئەمریکا لە هەژماری خۆی لە تۆڕی کۆمەڵایەتی تویتەر پەیامێکی بڵاوکردەوە و نوسیویەتی: "ئابڵوقەکانی سەر ئێران بە فەرمی چەسپان، ئەمانە دژوارترین ئابڵوقەن تا ئێستا سەپابن".

ترەمپ دەشڵێت: "لە مانگی 11 ئابڵوقەکان دەچنە قۆناغێکی دژوارترەوە، هەرکەسێک بازرگانی لەگەڵ ئێران بکات، بازرگانی لەگەڵ ئەمریکا ناکات، من تەنها داوای ئاشتی جیهانی دەکەم، هیچی دیکە!".

ئەمریکا ناڕازییە لە هەوڵەکانی ئێران بۆ دەستتێوەردان لە وڵاتانی ناوچەکە و دەیەوێت لە رێگای سزاکان فشاری تەواو دروستبکات تا تاران لە پەلهاوێشتن بۆ رۆژهەڵاتی ناوەڕاست پەشیمان بکاتەوە، تارانیش هەم رەتیدەکاتەوە و هەمیش سوورە لەسەر ئەوەی سزاکانی ترەمپ چۆک بە کۆماری ئیسلامی دانادەن.

بڕیاروایه‌ له‌ 5ی نۆڤه‌مبه‌ری 2018، ئه‌مریكا بەشی دووەمی سزاکانی بەسەر ئێراندا بسەپێنێتەوە، لەم بەشەدا هەناردەکردنی نەوت و گازی ئێرانی قەدەغە دەکرێت، ئه‌مریكا ده‌ڵێت هه‌ر وڵات و لایەنێک هاوردەی ئەم دوو سەرچاوە سەرەکییەی داهاتی ئێران بکات، ئه‌ویش روبەڕوی سزاکانی واشنتن دەبێتەوە.


PM:09:33:08/08/2018


ئه‌م بابه‌ته 2664 جار خوێنراوه‌ته‌وه‌‌