په‌رله‌مانتارێكی پارتی: پڕۆژه‌كه‌ی حكومه‌ت بۆ چاكسازی خانه‌نشینی دەبێت به دیراسه‌ته‌وه جێبه‌جێ بكرێت
وێستگه نیوز- پشتیوان جه‌مال
په‌رله‌مانتارێكی پارتی له په‌رله‌مانی كوردستان پڕۆژه‌كه‌ی حكومه‌تی هه‌رێم بۆ چاكسازی له مووچه‌ی پله و خانه‌نشینی به هه‌نگاوێكی باش ده‌زانێت، به‌ڵام به‌لایه‌وه گرنگه به دیراسه‌ته‌وه جێبه‌جێ بكرێت.
نازم هه‌ركی، په‌رله‌مانتاری پارتی له په‌رله‌مانی كوردستان به وێستگه نیوزی راگه‌یاند، پڕۆژه‌كه‌ی حكومه‌تی هه‌رێمی كوردستان زۆر باشه، چونكه حكومه‌ت و په‌رله‌مانی كوردستان و خه‌ڵكیش ده‌یانویست چاره‌سه‌ری ئه‌و گرفتانه بكرێن، له‌به‌رئه‌وه‌ی خه‌ڵكانێك هه‌بوون خانه‌نشین كراون، یان خه‌ڵكانێك به پله‌یه‌كی تایبه‌ت خانه‌نشینكراون و شایه‌نی ئه‌وه نه‌بوون.
هه‌ركی وتی: "ده‌بێت خانه‌نشینی به‌سیسته‌مێك رێكبخرێته‌وه، به‌ڵام له هه‌مانكاتیشدا نابێت به‌هۆی پڕۆژه‌كه‌شه‌وه خه‌ڵك نانبڕاو بكرێت و بكرێنه قوربانی، به‌ڵكو ده‌بێت به دیراسه‌ته‌وه پڕۆژه‌كه بكه‌وێته بواری جێبه‌جێكردنه‌وه".
ئه‌مڕۆ د. ئامانج ره‌حیم، سكرتێری ئه‌نجومه‌نی وه‌زیرانی هه‌رێمی كوردستان له په‌یجی تایبه‌تی خۆی له تۆڕی كۆمه‌ڵایه‌تی فه‌یسبووك له بابه‌تێكدا به‌ناوی "پڕۆژه‌ی خه‌ڵك.. بۆ مووچه‌خۆری شایسته و ئاسووده‌یی ویژدان"، رایگه‌یاندووه كه "پڕۆژه یاسای (چاكسازی له خانه‌نشینی و مووچه و ده‌ڕماڵه) له دووتوێی 20 مادده، بۆ چاكسازی له بواری مووچه و خانه‌نشینی، به‌خۆشحاڵیه‌وه به بڕیاری ژماره 129ی ئه‌نجومه‌نی وه‌زیران په‌سه‌ندكرا و ره‌وانه‌ی په‌رله‌مان ده‌كرێ كه داواكاری له مێژینه‌ی كۆمه‌ڵانی خه‌ڵكی كوردستانه".
د. ئامانج ره‌حیم نووسیه‌تی: "پرۆژه‌كه میكانیزمی ئاشكرای بۆ دانراوه له 90 رۆژی یه‌كه‌می ساڵی دارایی 2018 ده‌بێت بكه‌وێته بواری جێبه‌جێبكردنه‌وه، به‌مه‌ش هه‌م دادپه‌روه‌ریی و هه‌م بڕه پاره‌یه‌كی زۆر ده‌گه‌ڕێته‌وه تا مووچه‌ی مووچه‌خۆرانی شایسته‌ی لێ بدرێ".
سكرتێری ئه‌نجومه‌نی وه‌زیران ده‌ڵێت: "ئه‌م پڕۆژه گرنگه، پڕۆژه‌ی هاوبه‌شی حكومه‌ت و په‌رله‌مان و دامه‌زراوه‌كانی چاودێریی و نه‌زاهه و داواكاری گشتی و شورایه، و ده‌بێت هی سه‌رجه‌م حیزبه‌كانیش بێت به دێرین و نوێوه".
راشیگه‌یاندووه كه "به هیوام قۆناغی ته‌شریعكردنی له په‌رله‌مانی كوردستان زوو به‌جێ بهێنرێت و له‌وه‌ش گرنگتر (جێبه‌جێكردن)یشی له لایه‌ن هه‌مووان به‌دی بكرێت، تا دادپه‌روه‌ریی بچه‌سپێ و چیتر مووچه‌خۆری شایسته نه‌بێته قوربانی ئه‌وانه‌ی كه به ناڕه‌وایی له پاره‌ی گشتی سوودمه‌ندن كه به‌داخه‌وه هه‌ندێكی به یاسا ره‌واییان پێدراوه".
سكرتێری ئه‌نجومه‌نی وه‌زیران جه‌ختی له‌وه‌شكردووه‌ته‌وه كه "ته‌نها به (چاكسازیی و دادپه‌روه‌ریی) مووچه و بژێوی شایسته‌ی خه‌ڵك زامن ده‌كرێ".
ده‌قی نووسراوه‌كه‌ی ئه‌نجومه‌نی وه‌زیران و ئامانجه‌كانی ده‌ركردنی یاساكه‌یه:
پشتبه‌ست به ئه‌حكامی مادده‌ی هه‌شته‌م له یاسای ئه‌نجوومه‌نی وه‌زیرانی هه‌رێمی كوردستان ژماره (3)ی ساڵی 1992 هه‌موار كراو و، له‌به‌ر رۆشنایی كۆنووسی كۆبوونه‌وه‌ی ئاسایی ئه‌نجوومه‌نی وه‌زیران ژماره (39) له رێكه‌وتی 21-12-2017 بڕیاردرا به :
1- په‌سندكردنی پڕۆژه‌یاسای (چاكسازیی له خانه‌نشینی و مووچه و ده‌رماڵه و به‌خشین و ئیمتیازه‌كانی دیكه له هه‌رێمی كوردستان- عێراق) ، كه وێنه‌یه‌كی هاوپێچی ئه‌م بڕیاره‌یه و، ره‌وانه‌كردنی بۆ په‌رله‌مانی كوردستان له رێگه‌ی به‌ڕێز وه‌زیری هه‌رێم بۆ كاروباری په‌رله‌مان به مه‌به‌ستی گفوتگۆكردن و بڕیاردان له‌سه‌ر پڕۆژه‌یاساكه.
2- وه‌زاره‌ت و لایه‌نه په‌یوه‌ندیداره‌كان ئه‌م بڕیاره جێبه‌جێ ده‌كه‌ن.
نێچیرڤان بارزانی
سه‌رۆكی ئه‌نجوومه‌نی وه‌زیران
ئامانجه‌كانی ده‌ركردنی ئه‌م یاسایه بریتین له‌مانه‌ی خواره‌وه
1- به‌رجه‌سته‌كردنی یه‌كسانی و دادپه‌روه‌ری له خه‌رجكردنی مووچه و ده‌رماڵه و به‌خشین و ئیمتیازاته داراییه‌كانی تر له هه‌رێمی كوردستان و راگرتنی سوودمه‌ندبوونی ناشایسته له بودجه‌ی گشتی
2- خاوێنكردنه‌وه‌ی ناوی سوودمه‌ندان له بودجه‌ی گشتی له كه‌سانی ناشایسته و كه‌مكردنه‌وه‌ی خه‌رجییه‌كانی ته‌رخانكراوی مووچه و ده‌رماڵه.
3- رێگه‌گرتن له سوودمه‌ندبوون له بودجه‌ی گشتی بۆ زیاتر له جارێك.
4- به‌دامه‌زراوه‌ییكردن و یه‌كخستنی به‌ڕێوه‌به‌رایه‌تی و فه‌رمانگه جیاجیاكانی خانه‌نشینی له به‌ڕێوه‌به‌رایه‌تی گشتیی خانه‌نشینی له وه‌زاره‌تی دارایی و ئابووری و چالاككردنی سندووقی خانه‌نشینی.
5- رێكخستنه‌وه‌ی خانه‌نشینی خاوه‌ن وه‌زیفه باڵاكان و پله‌تایبه‌تییه‌كان له‌سه‌ر بنه‌مای گه‌یشتن به‌ته‌مه‌نی یاسایی دیاریكراو بۆ خانه‌نشینی و ساڵانی خزمه‌ت.
هــ. ر
PM:07:53:30/12/2017
ئه‌م بابه‌ته 11208
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت