ئه‌نجومه‌نی وه‌زیرانی هه‌رێمی كوردستان كۆده‌بێته‌وه‌

‌دیمەنێک لە کۆبوونەوەی ئەنجومەنی وەزیران.. ئەرشیڤ

وێستگه‌ نیوز ـ

ئه‌نجومه‌نی وه‌زیرانی هه‌رێمی كوردستان له‌سه‌ر چه‌ند پرسێك كۆده‌بێته‌وه‌ و سه‌ره‌كی ترینیان پێشنیازێكی وه‌زاره‌تی شاره‌وانییه‌ سه‌باره‌ت به‌ دامه‌زراندنی ئه‌نجومه‌نی شاره‌وانی هه‌رێم.


سه‌رچاوه‌یه‌كی تایبه‌ت به‌ وێستگه‌ نیوزی راگه‌یاند: ئه‌مڕۆ ئه‌نجومه‌نی وه‌زیرانی هه‌رێمی كوردستان كۆده‌بێته‌وه‌ و كۆبوونه‌وه‌كه‌ش له‌ چوار ته‌وه‌ر پێك دێت، كه‌ گرنگترینیان خستنه‌ڕووی پێشنیازی وه‌زاره‌تی شاره‌وانی و گه‌شت و گوزار سه‌باره‌ت به‌ په‌یڕه‌وی دامه‌زراندنی ئه‌نجومه‌نه‌كانی شاره‌وانی له‌ هه‌رێم.

راشیگه‌یاند: هه‌ر له‌ كۆبوونه‌وه‌كه‌دا چه‌ند راپۆرتێك له‌لایه‌ن وه‌زاره‌ته‌كانی شاره‌وانی و كاروباری شه‌هیدان و خوێندنی باڵا پێشكه‌ش ده‌كرێت، راپۆرته‌كه‌ی شاره‌وانی تایبه‌ت به‌ سیاسه‌تی به‌ڕێوه‌به‌ردنی خاشاك، راپۆرته‌كه‌ی وه‌زیری كاروباری شه‌هیدان و كاروباری ئه‌نفالكراوانیش تایبه‌ت ده‌بێت به‌ رووداوه‌كانی كه‌ركوك و خورماتوو و به‌سه‌ركردنه‌وه‌ی ئاواره‌كانی هه‌ردوو شاره‌كه‌، له‌ كه‌مپه‌كانی سنووری پارێزگای سلێمانی و ئیداره‌ی گه‌رمیان.

ته‌وه‌رێكی تری كۆبوونه‌وه‌كه‌ش، خستنه‌ڕووی راپۆرتێك ده‌بێت له‌لایه‌ن وه‌زیری خوێندنی باڵاو توێژینه‌وه‌ی زانستی، سه‌باره‌ت به‌ پرۆسه‌ی وه‌رگرتنی ده‌رچوانی ئاماده‌ییه‌كان له‌ زانكۆو په‌یمانگه‌كانی كوردستان بۆ ساڵی خوێندنی 2017 – 2018.

هــ. ر


PM:01:17:27/11/2017


ئه‌م بابه‌ته 2332 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت

زۆرترین خوێندراو