ئه‌میرێكی سعودی و چه‌ند به‌رپرسێك گیانیان له‌ده‌ستدا

‌مه‌نسور بن مقرن بن عه‌بدولعه‌زیز

وێستگه‌ نیوزـ

به‌هۆی تێكشكانی هه‌لیكۆپته‌ره‌كه‌یه‌وه‌ له‌ ناوچه‌یه‌كی باشوری عه‌ره‌بستانی سعودی، ئه‌میرێك و چه‌ند به‌رپرسێكی دیكه‌ی ئه‌و وڵاته‌ گیانیان له‌ده‌ستدا.

رۆژنامه‌ی عوكاز-ی چاپی عه‌ره‌بستانی سعودی بڵاویكرده‌وه‌ كه‌ هه‌لیكۆپته‌ره‌كه‌ مه‌نسور بن مقرن بن عه‌بدولعه‌زیز، جێگری ئه‌میری ناوچه‌ی عه‌سیر و چه‌ند به‌رپرسێكی حكومیی گواستوه‌ته‌وه‌ و دوای بچڕانی په‌یوه‌ندی له‌گه‌ڵیدا، فڕۆكه‌كه‌ له‌ ناوچه‌ی ریده‌-ی باشوری ئه‌و وڵاته‌ تێكشكاوه‌.

روداوه‌كه‌ له‌ ئێواره‌ی رۆژی یه‌كشه‌ممه‌ 5ی تشرینی دووه‌می 2017 رویداوه‌ و له‌ دوایین ده‌ركه‌وتنیشیدا، گرته‌یه‌كی ڤیدیۆیی ئه‌میر مه‌نسور له‌ سه‌رله‌به‌یانیی هه‌مان رۆژ بڵاوكراوه‌ته‌وه‌ كه‌ چه‌ند پرۆژه‌یه‌كی له‌ پارێزگای ئه‌لبه‌رك-ی عه‌ره‌بستانی سعودی به‌سه‌ر كردوه‌ته‌وه‌، به‌ڵام له‌كاتی گه‌ڕانه‌وه‌ی بۆ ناوچه‌ی عه‌سیر، ئێواره‌ی ئه‌و رۆژه‌ هه‌لیكۆپته‌ره‌كه‌ی تێكشاوه‌ و گیانی له‌ده‌ستداوه‌.

سه‌باره‌ت به‌ هۆكاری كه‌وتنه‌خواره‌وه‌ ئه‌و هه‌لیكۆپته‌ره‌، لیوا روكنی فڕۆكه‌وان عه‌بدوڵا غانم قه‌حتانی، رایگه‌یاند كه‌ خراپیی كه‌شوهوا هۆكاری تێكشكانی هه‌لیكۆپته‌ره‌كه‌ی ئه‌میر مه‌نسور بووه‌.


ر.ع


PM:05:35:06/11/2017






ئه‌م بابه‌ته 8952 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت

زۆرترین خوێندراو