ئەردۆغان: کورد دەوڵەتی سەربەخۆی نابێت و دەسەڵاتدارانی هەرێمیش باجی ڕێفراندۆمەکەیان دەدەن
رەجەب تەیب ئەردۆغان سەرۆک کۆماری تورکیا
وێستگە نیوز-
رەجەب تەیب ئەردۆغان سەرۆک کۆماری تورکیا ڕایگەیاند، دەسەڵاتدارانی هەرێمی کوردستان باجی ئەو ڕیفراندۆمە دەدەن کە کردیان لە کاتێکدا لەسەر ئاستی هەرێمایەتی و نێودەوڵەتی دژایەتی دەکرا.
ئەردۆغان لەوتەیەکدا بۆ ئەندامانی حزبەکەی لەشاری ئەرزڕۆم وتی: "کورد بەهیچ شێوەیەک دەوڵەتی سەربەخۆیان نابێت، وتیشی: "هەرێمی کوردستان برینێکیان لەناوچەکە دروستکرد بۆئەوەی هێندەی تر دۆخەکە ئاڵۆز بکەن".
لەبارەی پەیوەندی ئابوری هەرێم و تورکیاشەوە ئەردۆغان وتی: "پەشیمان نین لەوەی لە ڕابردوودا کردویانە، بەڵام لەبەرئەوەی دۆخەکە گۆڕاوەو حکومەتی هەرێمی کوردستان هەنگاوی لەدژی تورکیا ناوە دەبێت باجەکەی بدات".
لە رابردوودا ئەردۆغان هەڕەشەی ئەوەیکرد، ئەگەر وڵاتەکەی نەوت و ڕۆیشتنی بارهەڵگرەکان بۆ هەرێمی کوردستان بوەستێنێت خەڵکەکەی برسی دەبن، بەڵام لە ئێستادا دەڵێت: "رێوشوێنەکانی تەنیا ئەو کەسانە دەگرێتەوە کە لەپشت ئەنجامدانی ڕیفراندۆمەوە بوون".
دوێنیش بینالی یڵدرم سەرۆک وەزیرانی تورکیا وتی، لەمەودوا ئەنقەرە بەهیچ شێوەیەک مامەڵە لەگەڵ دەسەڵاتدارانی هەرێمی کوردستاندا ناکات و پەیوەندییەکانیان لەگەڵ هەرێم لەڕێی حکومەتی ناوەندییەوە ئەنجامدەدات.
رۆژی دووشەممە 25ی ئەیلول هەرێمی كوردستان وێڕای هۆشدارییە ئیقلیمی و نێودەوڵەتییەكان ریفراندۆمی بۆ سەربەخۆیی كوردستان ئەنجامدا.
د.ف
PM:06:56:30/09/2017
ئهم بابهته 15132
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت