43 هەزار موچەخۆر لە لیستی موچە دەردەكرێن
تۆمارکردنی بایۆمەتری
وێستگه نیوزـ
دوای دەستپێكردنی تۆماكردنی ناوی موچەخۆران و فەرمانبەران تا داخستنی تۆماركردن له سیستمی بایۆمهتری، وێڕای ئەوانەی كە قوتابیی تواناسازی و مۆڵەتی بێ موچە و خانەنشینانی دەرەوەی وڵات و ئەوانەیشی لەناوخۆ تۆمار نەكراون، 43 هەزار موچەخۆر بەهۆی ئەوەی خۆیان تۆمار نەكردوە، لە لیستی موچەدا لابراون.
ههفتهنامهی باس لهوبارهیهوه بڵاویكردووهتهوه كه بەپێی داتاكان، دەردەكەوێت 43 هەزار مووچەخۆر خۆیان تۆمار نەكردووە، واتە لە لیستی مووچەدا دەرهێنراون، ئەگەر ئەو 43 هەزار كەسە مانگانە هەر یەكەیان 400 هەزار دیناری هەبوبێت، ئەوا دوای دهركردنیان له لیستی موچهی مانگانه 17 ملیار و 200 ملیۆن دینار بۆ بودجەی گشتی دەگەڕێتەوە.
بەپێی بەدواداچونەكانی هەفتەنامەی باس، بەشێك لەو كەسانەی لە تۆماری موچەدا تۆمار نەكراون، پەیوەندییان بەوەوە هەیە دوو موچەی نایاساییان هەبووە، لە ترسی لێرسینەوەی یاسایی، تەنیا لە یەك شوێندا خۆیان لە سیستەمی بایۆمەتری تۆمار كردووە و لە فەرمانگەی پێشوویان دەستیان لە كار كێشاوەتەوە، بەشێكی تریشیان پەیوەندییان بە موچەی كۆمەڵایەتییەوە هەیە لە كەمئەندامان و خاوەن پێداویستیی تایبەت.
سەمیر هەورامی، وتەبێژی سیستمی بایۆمەتریی موچە دوپاتی كردەوە كە ژمارەیەك لە موچەخۆران خۆیان تۆمار نەكردووە، یان تۆمار نەكراون و وتی: "یەک ملیۆن و 202 هەزار موچەخۆر تۆمار كراون، بەگشتی 60 هەزار كەس ماون تۆمار بكرێن، بەشێك لەوانە قوتابییانی تواناسازی و مۆڵەتی بێ موچە و موچەخۆرانی دەرەوەی وڵاتن".
روونیشی كردەوە كه تیمەكانیان دەستیان كردووە بە بەراوردكردنی داتا تۆماركراوەكان: "ئەو ناوانەی لە سیستەمەكە تۆمار كراون، ئەوەی دوو موچەی نایاسایی هەبێت، ئەوا لە لیستی موچە دەردەهێنرێت".
هەورامی دووپاتی كردەوە، یەک ملیۆن و 305 هەزار موچەخۆر لە هەرێمی كوردستاندا هەن، بەڵام تا ئێستا یەک ملیۆن و 202 هەزار خۆیان تۆمار كردووە، نزیكەی 60 هەزار كەسی تریش ماون تۆمار بكرێن.
سەمیر هەورامی ئاماژەی بەوەشدا تائێستا هیچ ژمارەیەكیان لەسەر دوو موچەییەكان بۆ دەرنەكەوتووە، چونكە پڕۆسەكە تەواو نەبووە و وتی:"ناوەكان بەتەواوی داخڵ نەكراون، كە ئەو پڕۆسەیه تەواو بوو، فەرمان بە سێرڤەرەكە دەكرێت تا ناوی دوو موچەییەكان بە یاسایی و نایاسایی جیا بكرێنەوە".
سهمیر ههورامی جەختدەكاتەوە، لە موچەی مانگی داهاتوودا ئەوەی تۆماری بایۆمەتریی نەبێت و كۆدی سیستمی تۆماركردنی نەبێت، موچەی پێ نادرێت، بەمەش داتای تەواوی ئەو كەسانە ئاشكرا دەبێت كە خۆیان لە سیستمی بایۆمەتریدا تۆمار نەكردووە.
هاوكات ئارام حاتەم محەمەد، بەڕێوەبەری تۆڕی پاراستنی كۆمەڵایەتی لە وەزارەتی كار و كاروباری كۆمەڵایەتیی حكومەتی هەرێمی كوردستان رایگهیاند: زۆر لە كەمئەندامان و خاوەند پێداویستیی تایبەت خۆیان لە تۆماری بایۆمەتری تۆمار نەكردووە.
وتیشی هۆكارهكه ئهوهیه كه:"زۆر لەو كەسانەی خۆیان تۆمار نەكردووه، كەمئەندام نەبوون و بە فێڵ و واستە خۆیان تۆمار كردوە، هەیە دوو موچەی هەبووە، لە ترسی لێپرسینەوە تەنیا خۆی لە تۆماری موچەخۆری تۆمار كردووە".
ئاشكراشی كرد، بەپێی ئەو داتایانەی لەبەردەستیانە، زیاتر لە هەزار كەس لە كەمئەندامان لە سیستمی تۆماری موچە خۆیان ناونوس نەكردووە.
پێشتریش هیوا ئەفەندی، سەرۆکی فەرمانگەی تەکنەلۆژیا و زانیاری ئاشکرای کردبوو لە ھەر 100 ھەزار ناوی تۆمارکراو لە بایۆمەتریدا 10 ھەزار کەس ناوی دوبارە بوەتەوە.
AM:10:09:22/08/2017
ئهم بابهته 4356
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت